《小傳日記》今晚淘寶（０９９８８）、京東（０９６１８）嘅６１８促銷大戰就開始喇，
本身都對哩個傳統購物節都唔抱期待，但淘寶今次另闢蹊徑，同家人們最愛嘅小紅書聯手推出「
紅貓計劃」，打通從「種草」（商品推薦）到購買嘅全鏈路，相當於小紅書為淘寶提供引流窗口
，以後喺小紅書睇到啱心水嘅商品後，唔需要自己手動打開淘寶去搜索，而係直接從小紅書跳轉
到淘寶。互聯網大廠最忌引流到對家，用戶以前喺小紅書嘅貼文入邊提到「淘寶」、「京東」，
貼文統統都會被限流，小紅書玩電商屢敗屢戰，或者抱住打唔過就加入嘅心態，同淘寶合作，打
入敵人內部！
　
　　小紅書同淘寶都係各自領域嘅巨頭，但問題係淘寶冇流量，小紅書冇變現，兩者嘅增長紅利
都係度見頂。睇下淘寶最近嘅業績就知，淘天集團營收雖然有１３６０﹒９１億人仔，但按年增
長先得５％。阿里電商嘅營收同淨利潤增長近乎停滯，直營同其他收入同期仲跌咗９％，之前兩
季都分別跌過９％同５％。自己龜速前進，但競爭對手卻係跑步直追。舊年，抖音ＧＭＶ達
３﹒４３萬億人仔，快手（０１０２４）ＧＭＶ亦達２﹒７萬億人仔，短視頻ＡＰＰ憑藉
ｒｅｅｌ同直播主場優勢，加速蠶食傳統貨架電商嘅份額。
　
　　淘寶又點會唔知道要轉型呢，不過弊在阿里每次進軍社交電商都係失敗收場。２０１６年淘
寶就上線咗淘寶直播，到咗２０２０年又將淘寶買家秀社區升級做淘寶逛逛，並且放咗喺首頁嘅
一級入口位，但結果通通失敗。
　
　　而另一邊，小紅書嘅情況就恰恰相反，坐擁２﹒６億月活用戶，內容涵蓋美妝、穿搭、家居
等個領域，但偏偏就做唔起電商。舊年小紅書電商ＧＭＶ先得４０００億人仔，同抖音、快手求
求其就萬億嘅規模相比，乜水平就唔使多講。電商領域巨頭林立，小紅書只可以喺「生活方式電
商」哩種小眾路線上面發展，但就算係咁都一樣冇乜起色，商家自營店鋪佔比不足１５％，用戶
就算睇中心水款式，都只會退出小紅書，轉去淘寶、京東呢啲大平台落單。
　
　　於是小紅書同淘寶一拍即合，小紅書為淘寶帶嚟高消費力嘅用戶，彌補咗淘寶嘅流量弱項，
而淘寶亦為小紅書帶嚟廣告嘅持續投放，獲得新嘅收入增長點。今次紅貓計劃特登喺６１８之前
公布，表面係齊齊造勢谷ＧＭＶ，實際就係藉６１８試下呢段「商業婚姻」嘅默契，順便睇下有
冇機會打贏京東，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。

【etnet獨家優惠】親手炮製母親節＆端午節海鮮盛宴！使用優惠碼享95折優惠！► 立即了解