今日市場本應開心先係，因為央媽終於出手，其中包括三類十項政策，降準、降息之外，仲包括將互換便利和股票回購增持再貸款額度合併使用。今日港股恒指高開507點，但之後大部分升幅都蒸發，半日埋單都係升百幾點。

　　加埋之前港匯不停有資金流入，點解都係無打雞血FEEL？呢轉500點升幅變成大家逃生門？其實無他，大家都對政治氣氛無太大信心。

　　雖然恒指已經補返4月7日果個裂口，但大家短時間內被玩玩太多「狼來了」，去年10月8日單日大跌2000幾點，今年4月7日大跌3000點，大家都學曬陶大宇係《大時代》跳樓個幕入面咁，難道你大叫：「我唔玩啦，可唔可以俾返啲錢我阿？」又會WORK？

　　所以今日港股升幅蒸發，係唔意外、唔驚喜、唔緊張。博客認為，衡量入市因素其中一個關鍵，就係金價，只要金價不跌，大家都係防守、防守、防守，資金係好難炒到上去，就算今日恒指升到上二萬三，都只係另一個狼來了的割韭菜事件，大家都係怕怕。

　　博客個MPF就係因為去年10月，唔見左三萬幾，起碼我唔會入市先，繼續買金保平安。

《編者按》本欄搜羅即市傳聞，惟消息未經證實，《經濟通》亦不保證內容之準確性。

【香港好去處】2025去邊最好玩？etnet為你提供全港最齊盛事活動，所有資訊盡在掌握！► 即睇