呢幾日博客同班BANKER吹水，聽聞投資圈已經開始收水，咁當然唔係一口氣咁沽貨，而係慢慢咁逐步清倉。

　　博客問個仔細，不外乎兩個原因：AI泡沫定日本泡沫。

　　先講AI，班Banker朋友話，其實美國AI算力已經有過剩情況，而基建係講緊電力問題，供電不足係目前情況，另外仲估計緊未來兩三季GPU賣唔賣得去呢個問題，佢地認為美股估值確實過高，高到一個情況下一爆連美國政府都救唔到個隻；再加上中國開始慢慢脫離對美國芯片需求，呢一個先係大問題。

　　連巴郡渣現金都去到歷史新高，睇怕美股調整都係時間問題，巴郡等緊掃平貨。

　　另一個就係日本泡沫，其實就係講緊日經突破50000點，高市早苗鴿派方針同植田和男鷹派言論，大家互扯貓尾，同特朗普與鮑威爾有異曲同工之妙，就係大家都唔知市場係鴿係鷹，股市就炒到歷史新高，咁樣先最危險。

　　關鍵係，日本股市有好多同AI未必有太大關係嘅股份，都被人當係AI咁炒，似係「最後的狂歡」狀態。

　　博客問，港股會唔會有影響？班BANKER笑左一笑，答：「港股都跌慣跌熟，跌三五千點都係平常，有咩好驚？如果你話AI定日本邊個快啲爆，你要問上帝啦。」

《編者按》本欄搜羅即市傳聞，惟消息未經證實，《經濟通》亦不保證內容之準確性。

【你點睇？】日揆言論引發中日關係惡化，當局更新外遊警示呼籲赴日提高警惕。你短期內會否赴日旅行？► 立即投票