記得上個禮拜博客所講，班BANKER話資金開始撤退市場，隔晚美股又急瀉，今日（18日）日經又跌900幾點，連50000點關口都失守埋。

　　睇返VIX恐慌指數，目前都只係22左右，同美股上一次恐慌大跌係50幾水平仲有一段距離，但當恐慌來臨時後，由20幾去到50幾，可能都只係一晚嘅事情。

　　另外，道指條10天線向下，博客認為如果跌穿20天線就係第一階段熊市開始；有人話美股升咁多，回調下都好正常，有乜好驚啊？

　　如果呢番說話係環境好個陣講，博客都會咁覺得；但美股呢次隻牛來得比較急同快，道指短短一年內由38000點升到46000點，唔少因素都係由科技股帶動。而家美國風向吹緊AI泡沫、GPU算力過剩，擺明就係「空軍」開始殺到，連帶比特幣都開始遭殃。

　　通常環球股市下跌，幣市、金市就會有資金流入；但今時今日股、幣、金一齊殺殺殺殺殺！反映出環球資金真係開始收水，唯一可以穩守就只有現金。

　　有時有啲嘢唔好唔信邪，到年尾了，盡量套現旁身啦大家，美股日股雙殺，你仲頂得幾耐？順帶一提，今日港元急跌，資金到港，好大機會來香港避險了。

《編者按》本欄搜羅即市傳聞，惟消息未經證實，《經濟通》亦不保證內容之準確性。

【你點睇？】日揆言論引發中日關係惡化，當局更新外遊警示呼籲赴日提高警惕。你短期內會否赴日旅行？► 立即投票