《小傳日記》兩會過後阿爺嘅提振措施開始慢慢滲出嚟，繼之前重磅現銀谷生育之後，似乎銀彈攻勢未完，今日再有由資金方面谷消費措施提出，令魚缸今日先跌後成２００幾點。　　　近期金監總局下發《通知》，為促進消費而提升消費貸款額度，對於信用良好、有大額消費需求的客戶，自主支付金額上限由３０萬（人仔．下同）提高到５０萬，個人互聯網消費貸款金額上限由２０萬提高到３０萬。還款期限都有所延長，商業銀行用於個人消費嘅貸款期限可以由五年延長至最多七年。　　　雖然都唔算直接派錢，但都係鼓勵用錢嘅措施之一，魚缸於是低位借勢反彈一下，２００幾點畀下面。點解話係借勢呢，講真加借錢額度同上次生仔派錢感覺細力得多，上次一生即派現金，仲係萬萬聲咁派，今次只係提高借錢額度，即係只係令想使錢嘅人使多咗，但唔想使嘅人一樣唔借唔使。　　　慳囊難解，睇吓消費股就知道。名創優品（０９８９６）公布上年第四季同全年業績，季度營收按年多２２％至４７﹒１億銀，略為低過《彭博》綜合分析預期嘅４８﹒１億，而其餘市場最期待海外營收方面都算符合預期，按年增加４３％，相反國內就差少少，同店銷售略為下滑。整體嚟講就係無乜驚喜，比起對手泡泡瑪特（０９９９２）仍然係輸幾條街。　　　其實上次之後普遍孖屐都係期待有更加多嘅派錢措施，但今日睇到暫時都未係嗰份力度。雖然今日恒指２０天線下有得彈一彈，但今日成交細過上日，反映個彈力略嫌不足，真回升定死魚彈都係要睇定啲先，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【你點睇？】【你點睇？】中美經貿會談獲實質進展，雙方發佈聯合聲明並互降關稅。你對接下來的磋商是否有信心？► 立即投票