《小傳日記》乜嘢叫做命運共同體？睇小米（０１８１０）同雷軍就知答案。小米最近正值多事之秋，雷軍何嘗唔係？噚日（１４日）就有網友發現，一向自信滿滿嘅雷軍喺微博最新設定「關注１００天才能評論」功能，莫非係畀人鬧到怕？　　　又難怪雷老闆咁意興闌珊！小米呢幾個月又真係頭頭碰著黑。先有３月２９日喺安徽高速路撞車釀成三死意外。本來以為事件告一段落，點知近日又畀人揭發小米ＳＵ７　Ｕｌｔｒａ嘅前艙蓋，僅有裝飾功能，完全無官方所講嘅散熱功能。即使小米公開致歉並推補償方案，但有準車主完全無法接受，自發組建數百人嘅維權群組。　　　小米正值多事之秋，連忠心耿耿嘅米粉戰鬥力都下降，雷軍索性限制評論遠離是非。不過，小米集團公關部王化就出來解畫，話呢個熱搜有點小題大做，雷軍限制評論已經好長一段時間，主要係為咗防水軍。言外之意即係有人故意搞事，話雷老闆玻璃心啫。　　　小米造車幾乎係全行最慢，但佢造嘅新車除咗被指太似保時捷之外，無論銷情定口碑一直都算唔錯。早幾日公布嘅神州汽車銷量榜，小米ＳＵ７仲攞咗４月份金額１０萬人仔以上價位嘅銷量冠軍，仲要係唔分車型、唔分新舊能源車嘅銷量冠軍。本來風光無限，點解突然間天堂跌落地獄？你梗係話係車嘅質素或技術問題，但我話，可能係首富嘅魔咒。大家可能唔記得，又或者唔知道，原來雷老闆年初做過短時間神州首富。就喺２月２７日，小米股價盤中一度升超４％，唔單止刷新小米集團股價歷史新高，亦令雷老闆財富水漲船高，一度超越農夫山泉（０９６３３）創辦人鍾睒睒，成為神州新首富。　　　神州向來有首富魔咒嘅說法，人怕出名豬怕壯、槍打出頭鳥、樹大招風，中庸之道嘅智慧就真係自古以來喇。以往好幾個首富後來都唔多唔少有啲濕滯。如家電界第一代巨人黃光裕，本來前途一片光明，卻突然鋃鐺入獄；地產巨富王健林同許家印同樣曾經富可敵國，而家就債務纏身，首富變「首負」；科技界強人「雙馬」算係比較好彩，不過近年都要收斂鋒芒；至於近年崛起嘅「大自然搬運工」鍾首富都不能倖免，明明賣水賣茶夠晒安全，一樣畀人話唔愛國，心靈受創。　　　不過，雷軍首富好彩做得好短時間，情況應該未至於太差。而家小米只需要韜光養晦，靜靜地處理好件事，未來有新車出依然有米粉吹奏。雷老闆可以搞得起金山，可以搞得起小米，無理由搞唔掂眼前呢啲芝麻綠豆小事，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【香港好去處】2025去邊最好玩？etnet為你提供全港最齊盛事活動，所有資訊盡在掌握！► 即睇