《小傳日記》侵侵玩變臉，隨時連神州國粹川劇變臉都可能唔夠佢快。一時話同習大大關係點好，轉頭又威嚇，話唔撤銷反制就加多五成關稅。當市場仲喺度估估下，究竟佢今次係唔係嚟真，定係好似ＴｉｋＴｏｋ問題咁，延遲再延遲。點知今次佢就一錘定音，即時加多五成關稅，前後加加埋埋去到１０４％。魚缸今早都畀佢嚇到離一離，今早黑期一度瀉千點，好在開市都只係低開６００幾點，之後跌幅仲慢慢收窄，尾段更加倒升。　　　其實，今日即使大市跌緊，都有唔少股份逆市升。其中，中船防務（００３１７）同中航科工（０２３５７）更加愈戰愈勇。尤其係中船防務，即使今早恒指插緊六百幾點時，中船防務股價照樣升，全日未跌過，午後更曾加飆兩成。　　　睇返資料，原來中船防務發盈喜，集團預料今年首季最多賺２億人仔，按年升最多１２倍。奇怪嘅係，舊年公布首季業績要等到４月底，今年突然提早兩星期，係咪真係咁啱呢？又或者係見住市況差，想報個喜訊穩住投資者信心？呢點就見仁見智啦。　　　眾所周知，中船防務係港股中少有嘅軍工股，集團旗下雖然有商用船舶海工產品同船海應用業務裝備，但更突出嘅係軍用艦船、海警裝備、公務船等。今次遇著花旗國喊打喊殺，兩大軍工股逆市飆升，似乎要畀啲顏色侵侵睇。其實，而家風頭火勢，全球股市風雨飄搖，一般股份發盈喜都唔一定包保股價有得升，但中船防務就升到離行離罅。中船防務有盈喜就話姐，但中航科工無發盈喜，股價一樣升唔少，最多升９％。　　　關稅戰後續發展仍然難以預測，就今日股市表現嚟睇，似乎今次神州先勝一局，事關噚晚花旗國股市本來升到好哋哋，但一聽到話加徵神州關稅時，就掉頭向下，三大指數齊倒跌收場，反而神州同香江股市喺政策憧憬之下仍然倒升，首回合先拔頭籌。不過侵侵一覺醒來，見到人仔急跌，可能又會話神州操控匯率，難保唔會再出新招打壓，喺咁嘅市況下，與其驚青唔知揀咩股，不如考慮下「打得嘅股份」，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

etnet香港好去處推出小紅書版！立即追蹤@通仔GoGoGo 以獲取最新情報！► 即睇詳情