上次博客都寫過關於長和應該點樣「得大體」地賣走巴拿馬港口，無諗過幾日之後，《華爾街日報》就引述消息人士指，北京政府原本有意拎巴拿馬港口，用作同特朗普談判籌碼，家陣長和一個唔該就自己賣俾美國財團，打亂曬計劃，報導標題仲話係：China's Xi Is Angered by Panama Port Deal That Trump Touted as a Win。（特朗普稱巴拿馬港口協議是勝利，習近平對此感到憤怒）

　　北京係咪震怒，博客就真係唔清楚，畢竟都係「有傳」、「消息人士」、「聽聞」呢類字眼，不過北京嘅信號就相當明顯：你夠膽賣走巴拿馬港口，你以後就唔會有好日子過。

　　長和同長實聽日就派成績表，呢次講到明唔會舉行業績相關記者會，博客好似都未見過長和系會有呢個情況，呢個亦都係明智之舉，所謂「講多錯多、唔講唔錯」，總之呢個時候要低調、冷處理件事，唔回應就係最佳回應。

　　有人話，北京咁樣出口術，咪盞人覺得，香港「一國兩制」更加肉酸！錯啦，「一國兩制」一早講到明，中央人民政府負責香港嘅「外交事務」，而好明顯巴拿馬港口呢單嘢已經係上升到外交層面，中美博弈之際應該企喺邊一方，誠哥今次唔夠識做。但係話返兩頭，誠哥一直都係處事好圓滑，十分之有政治意識，睇嘢都相當長遠，所以你話呢單刁誠哥有份參與？博客有保留啦。

　　咁係咪無得拆彈呢？博客覺得又未去到呢個地步，其實呢次長和單刁，係巴拿馬港口連同其他資產一同打包出售；而家去到呢個層面，就無謂再堅持啦，將巴拿馬港口經營權，用5%溢價或者平手單獨賣返俾國企其實最穩陣，都係有限錢，國家俾得起，將呢個燙手山芋交返俾國與國處理啦，商家佬係呢個時候，其實賣俾邊個外國財團都係死。

《編者按》本欄搜羅即市傳聞，惟消息未經證實，《經濟通》亦不保證內容之準確性。

獨家優惠【etnet x 環球海產】用戶專享全場95折，特價貨品更可折上折。立即使用優惠代碼【ETN1WWS】，選購五星級酒店級海鮮► 立即瀏覽