今日博客望到MSCI公布執位，喺芸芸股票之中，博客見到隻老鋪黃金(06181)入咗中國指數同新興市場指數，博客係感到意外的。

　　意外嗰點並唔係佢入到指數，而係MSCI當佢係「新興市場」。博客覺得老鋪黃金最犀利嗰位，就係將傳統飾金買賣，變化成一種「奢侈品」，而呢種奢侈品係市場未見過，就算有，都未必做到好似老鋪黃金咁出位。

　　即係話，「奢侈品黃金」係MSCI眼中，就係一個新興藍海，而老鋪黃金就係國內一哥。博客留意到，呢幾年鑽石價格不斷下跌，同時人工鑽石又不斷侵占市場，所謂「鑽石恆久遠，一顆永流傳」，呢支歌仔已經無得再唱，消費者已經唔賣帳。

　　咁可能意味住，國內「飾金＋奢侈品」概念，有機會取代鑽石地位。你諗真吓，飾金最起碼係黃金，可能老鋪黃金賣個種飾金存在好高溢價，但你賣出去市場未必可以當奢侈品溢價回收；但鑽石一買一賣，市場回收根本唔值錢，3萬蚊鑽石玩下手可能得1萬幾千，真係嚇死人。

　　所以MSCI呢種操作，可能預示住黃金市場嘅變化，當純手工、值錢嘅黃金雕刻，用高於飾金嘅溢價賣去市場，老鋪黃金嘅股價，可能真係今日高位、明日低位。

《編者按》本欄搜羅即市傳聞，惟消息未經證實，《經濟通》亦不保證內容之準確性。

【說說心理話】舉辦「XO異彩藝術家奬」，讓「腦力多元」人士透過創作藝術建立自信，將負面的能量化為正向► 即睇