呢期堆茶飲新貴真一波未平一波又起，先唔好講蜜雪集團(02097)升到癡左線，500蚊一股真係升到不得之了CHICKEN WING咁，而家又到滬上阿姨(02589)來港上市，博客都係一句：抽爆佢！今日文章就係講咁多，拜拜！

　　咪住，都要聽下我分析嘅。滬上阿姨算係目前內地五大茶飲料店中增長最快，不過留意返，佢主要收入係來自「加盟商」，22/23年加盟商佔比大約係99.7%，截至2024年公司總門店數目大約接近9200間；單品GMV大約26蚊左右，算係中規中矩。

　　博客自己就無咩點飲過滬上阿姨，好似係南方佔比唔太高，店內主打「血糯米奶茶」，開業第一日已經排隊排到開巷。聽聞一開始係兩公婆係上海一個商場租間小店，兩公婆落手落腳做，發展到十幾年先有目前規模。

　　其實而家內地餐飲業發展迅速，只要你識做起一個IP、有一件出名單品，就好容易有風投主動接觸你，做ABCDE輪融資之後再上市，不論滬上阿姨定蜜雪，玩法都係大同小異。

　　呢期新股IPO表現都幾好，俾少少錢抽新股當買六合彩心態，中左基本上FREE MONEY，唔中都係輸一百幾十蚊，用呢個心態去抽就得啦。

《編者按》本欄搜羅即市傳聞，惟消息未經證實，《經濟通》亦不保證內容之準確性。

【你點睇？】英澳加葡承認巴勒斯坦國，你是否認同這些國家的做法？► 立即投票