千呼萬喚，華為同上汽集團(滬:600104)偷偷拖手仔幾個月終於官宣合作，帶嚟華為第五界--尚界。上汽身為國企果然財大氣粗，一出手就​​60億人仔​​，仲拉埋​​五千人團隊，喺上海起一個專屬於尚界嘅超級工廠。國企大佬加科技巨頭，擺明就係要玩鋪勁嘅。

　　雖然而家兩家公司甜蜜蜜，但其實之前兩家係一對冤家。2021年上汽董事長陳虹被問到會唔會同華為合作，佢就話上汽冇辦法接受由單一一家供應商提供整體嘅解決方案，如果係咁，供應商就會成為靈魂，上汽就只係軀殼，所以一定要將靈魂掌握喺自己嘅手上！呢個觀點其實係啱嘅，尤其係如今間間車企都要衝擊智慧駕駛嘅年代，點可以將核心部分全部外包，不過只要有華為加持，啲乜界乜界都賣得好好，上汽睇錢份上都只好低聲下氣！

　　上汽雖然頂住「中國最大車廠」個​​金漆招牌​​，但近年表現已經落後競爭對手。上年銷量已經連跌六年​​，純利仲​​暴跌九成​​，得返​​19億人仔​​，問題在於轉型速度慢、自主品牌發展差。其實上汽唔係冇眼光，早喺2014年上汽就開始發展新能源賽道，同年仲同阿里(09988)合作，聯合推出咗全球首架互聯網汽車。嗰陣時蔚來(09866)、小鵬(09868)先啱啱成立，理想仲未出世。但結果都係無以為繼，而後來被上汽寄予厚望嘅智己、飛凡都一樣冇晒影。

　　而華為哩邊亦唔好過，雖則憑住熊熊愛國心獲得一眾車主青睞，但係喺同行價格競爭之下，都要面臨困境。比亞迪(01211)發起智駕平權戰略，將智駕戰場擴大到20萬人仔以下嘅車型，幾乎相當於以本傷人，連一向囂張嘅華為常務董事、終端BG董事長余承東都感嘆，華為冇低成本控制能力，係做唔到20萬人仔以下嘅智駕車！

　　一個冇市場，一個冇供應鏈支持，但互補之下可能就有轉機。上汽嘅完整嘅供應鏈同強大嘅規模製造能力就啱好彌補咗華為冇低成本控制能力嘅缺陷，而華為嘅加持亦可以為上汽提供市場。尚界嘅定價低至15萬人仔，係鴻蒙執行體系中目前售價最低嘅車型。

　　上汽今次真係​​搏到盡，為咗安排尚界喺今年秋季正式上市，上汽決定調用最成熟嘅工廠進行第一款車嘅批產。上汽總裁賈健旭仲放話，「團隊5000人別無所為，就為咗尚界必須成功！」。愈來愈多傳統車企靠華為翻身進軍智駕車賽道，不過人哋出豉油你出雞，仲要到最後吃力不討好，所以長遠睇都係自己整晒成盤豉油雞就安全啲，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【說說心理話】網戀騙案：專家分析為何女性/高學歷人士較易「沉船」！若不幸被騙，如何處理自己情緒？► 即睇