《魚缸博客》話說吹左幾日，中美雙方都派人去瑞士「講數」，但呢一水唔使翻台，而係好似有實際成果，好似兩大字頭已經「大和解」，無事啦！大家可以返屋企啦！　　　實際成果係點？截至博客寫稿呢一刻都未公布，不過好多相關股份已經炒起，例如舜宇光學（０２３８２），今日又炒高一成。不過博客又質疑，降關稅又不等於將關稅降到「零」，中國製ｉＰｈｏｎｅ點都係好過印度製，運去美國都係要打稅的。所以呢場「和頭酒」係咪真係可以打消大家疑慮，博客係有保留。　　　但點解花旗國突然好似死狗咁搵中國擺酒？起初侵侵（特朗普）唔係係威係勢咁大叫ＭＡＧＡ（讓美國再次興盛），而家咁樣「跪」法，過唔過到中期選舉呀？　　　博客覺得，係呢個時候，有大堆熱錢流入亞洲；同一時間，花旗有６﹒５萬億美元美債喺６月就快到期，過往都係發新債掩蓋舊債；不過隨住美債係國際市場吸引力大減，其實佢地本身自己都擔憂緊以新換舊呢招仲得唔得，所以有合理懷疑相信，要係６月前同神州傾惦數，否則繼續差落去，貨幣市場都會有信心危機。　　　你會話，神州唔傾，由得佢美國貨幣信心倒台咪得，到時人民幣就上位，何樂而不為呢？但唔好忽略一點，神州係花旗國最大債主，美債倒台都係自損八百，所以呢個時候玩死對家，自己都唔好受，所以如果大家有心想傾，其實都要接受。　　　話番兩頭，大家經歷過呢次關稅之後，都見識到神州供應鏈的強大，喺ｉＰｈｏｎｅ零件製造上，花旗國根本搵唔到替代品，所以呢次先死死氣坐低傾，亦意味住呢班手機大佬繼續長做長有，所以而家撈底算唔算高位？明日低位囉我認為。　《編者按》本欄搜羅即市傳聞，惟消息未經證實，《經濟通》亦不保證內容之準確性。

《說說心理話》「星二代」有甚麼壓力？姜大衛兒子姜卓文參加《造星》：雖然輸了比賽，但卻得到很多！分享如何學會面對問題及成長► 即睇