選民登記活動極低調，幕後對投票率已打輸數？

　　仲有大約一個月，即6月2號，就係今年選民登記嘅截止限期，過往每逢立法會選舉年，大力催谷市民登記選民係各大政黨嘅重要活動之一，擺街站、搞大型活動派登記表等等，真係各出奇謀，除咗係其中一項政黨KPI之外，政黨亦希望借宣傳去吸一啲新嘅支持者。不過奇怪嘅係，今年有關嘅宣傳活動可以話係零，甚至連各議員嘅社交媒體，亦鮮有宣傳選民登記嘅post，何解呢？

　　Tina向政壇中人查問過，政壇中人指出，過往一向都會有「目標」去跑數，希望拉到幾多人去做選民登記，而各大有搞直選嘅政黨，亦非常依賴佢哋嘅區議員作為選民登記嘅「重心人物」，一來區議員係唔係都會定期擺街站見選民，二來拉到嘅新選民，好多時都會成為佢哋黨嘅未來支持者。不過，今年由選民登記正式開始至今，上頭都無落過任何指示，變相各大政黨都係「冷處理」，最多都只係掛吓橫額提市民選民登記截止日期。

選舉事務處在電車車身宣傳選民登記截止日期，而各大政黨卻沒有大動作。（政制及內地事務局fb圖片）

　　「谷選民登記係成個選舉年嘅序幕，希望喚醒市民今年將會有立法會選舉，盼推高選舉投票率。連選民登記都咁低調進行，好明顯就係無論中環同西環，對於今年投票率都唔會寄予厚望。如果打鑼打鼓都無人去登記，咁不如低調進行好過，起碼無咁肉酸⋯⋯」

　　睇番對上兩次選舉嘅投票率，2021年立法會選舉，唔計選委會界別，功能組別有32.22%，而地區直選只係有30.2%，分別創咗自1985年及1991年以來嘅新低；去到2023年區議會選舉，大幅度削減直選議席之後，投票率更只係得27.54%，亦係首屆區議會選舉以來最低。

2023年區議會選舉的投票率僅27.54%，為首屆區議會選舉以來最低。(AP)

　　同一位地區直選嘅立法會議員傾開，佢都直言對今年立法會選舉投票率唔太樂觀，特別係從平時接觸市民都感覺得到，依家市民普遍對立法會新聞不太感興趣，「過去幾年，立法會入面無乜火花，大家講嘅觀點角度其實都係大同小異，又真係好難要市民感到興趣。以前有反對派，咁支持穩定嘅市民就一定出來撐建制派，依家幾乎都係清一色，呢班建制支持者覺得投唔投都無乜所謂，自然就唔會出來投票」。佢亦相信，從低調處理選民登記來看，幕後應該亦唔會對投票率有高要求，估計唔好低過區議會選舉已經收貨。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

etnet香港好去處推出小紅書版！立即追蹤@通仔GoGoGo 以獲取最新情報！► 即睇詳情