睇媒體講到麥當勞考慮出售香港舖位，首階段將以標售形式出售8個優質核心舖位，估值合共達13.5億元，涉及尖沙咀、銅鑼灣及旺角等黃金地段。

　　博客上網搵過下資料，據傳媒報導，當年美國麥當勞公司出售香港經營權嗰陣，係無賣埋舖位，而且仲同中信簽落20年經營權。

　　全世界都知道，麥當勞做得快餐，價格已經壓到最低，透過「量變到質變」去賣包，不過賣包毛利實在好低，所以麥當勞一路都係買地舖租返俾有經營權嘅公司，嚴格來講，麥當勞公司係一家世界級別地產公司，經營賣包只係「副業」。

　　所以嚴格來講，如果物業就算大跌都好，但只要個物業一路都交租，仲要交足20年，係唔會有太大影響，因為物業價值有周期性，03年沙士咁低位，都無聽話麥當勞要放舖，而家都未到沙士咁差就話要放？

　　合理解釋可能就係政治因素，畢竟作為一間美國公司，第日中美又鬧過交個陣，呢堆資產又可能成為對家政治籌碼，不如趁仲有價賣走佢算。

　　呢個時候一車過咁放售核心舖位，必然對舖市有壓力，其他非核心舖又要再低一兩口價先放得走。你問博客係咪等於麥當勞睇淡香港樓市？又未必係全部，反正佢堆舖有返自己品牌租用，一路有租收一路有錢入，就咁睇落似係政治原因多少少啦！

《編者按》本欄搜羅即市傳聞，惟消息未經證實，《經濟通》亦不保證內容之準確性。

【說說心理話】照顧者壓力大 情緒出現問題應找心理醫生！嘉賓：「雖然很貴，但是值得的，他救了我一命！」► 即睇