大家呢一個月都經歷左四場「500年一遇嘅大雨」，眨下眼，大家原來一下子都變成2000幾歲囉！其實都反映咗，香港目前嘅去水系統，未必應付到未來嘅極端氣候，呢幾日落大雨，唔係有人炒車，就係發現條無頭屍，真係有幾離奇得幾離奇。

　　係外國，面對極端嘅情況，比起香港更加嚴峻，又有山火又龍捲風，咁保險公司究竟點樣分散風險呢？其實外國市場一路有款投資產品，佢就係將相關保險保單打包上市，變成類似債券或者基金嘅模式，投資者買左呢款投資產品，如果無事無幹，就會有高回報率收益，聽聞有成10%咁多！

　　咁假如有極端氣候發生，咁又點算呢？唔好意思啦，假如投資產品觸發紅線，佢就會好似牛熊證咁打靶，打靶所得嘅款項，就會拎去理賠返保單受益人。

　　所以某程度上，「氣候投資產品」可以話係保險公司將風險轉嫁俾投資者，即係投資者同天氣「對賭」，聽聞有大型投資者公司會請氣象學家同整部超級電腦，計算到個氣候有幾多機會可以做成破壞，如果有就拋貨，如果有災難發生又未造成傷害，就會趁低吸納之類。

　　其實呢種「賭天氣」都幾好玩，港交所會唔會考慮下引入呢？

《編者按》本欄搜羅即市傳聞，惟消息未經證實，《經濟通》亦不保證內容之準確性。

【香港好去處】2025去邊最好玩？etnet為你提供全港最齊盛事活動，所有資訊盡在掌握！► 即睇