上個禮拜耀才(01428)突然停牌，原來係螞蟻控股同大股東收購五成股權，作價28.14億，溢價約7.5%左右。不過今日耀才個股價好似癡左線咁，大力抽升七成幾。喂，炒得咁高，係咪睇錯左小數點啊你地？

　　不過，有大孖沙係香港券商落場，確實帶來新一番景象。自從富途係香港插旗之後，圈商幾乎都無對手，但凡抽新股，一睇，富途永遠係最大孖展個位。

　　仲記得博客見到富途剛剛落香港個陣，我就立即去申請，仲送咩惠康優惠券；到今時今日已經個APP大搞AI智能，連DEEPSEEK都PLUG埋落去。香港券商其實都有做手機APP，但大家都知道個問題：個UI真係搞唔惦，老土、慢、成跳彈APP、又無新聞睇。

　　所以而家螞蟻直接買起耀才，其實係28億買個DATA BASE同用戶資料，再加以優化，同富途爭一日之長短。呢件事係咪叫貴呢？其實睇你點解讀，如果自己落香港申請個券商牌、請人、搞OFFICE、然後整APP、搶客，呢件事分分鐘要搞個三五七年，而家28億買起耀才再自己搞，所謂「用錢買時間」，叫做快少少囉。

　　但螞蟻做券商有乜優勢？佢旗下有個偉大平台：支付寶，呢樣都係富途無嘅嘢。試幻想下假如螞蟻開個新APP買港股，然後支付寶帳戶直接過數，係香港返神州，定係神州返香港，都係秒速到帳，到時啲水來來回回咁走，哇！發囉呢鋪。　

《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet香港好去處推出小紅書版！立即追蹤@通仔GoGoGo 以獲取最新情報！► 即睇詳情