話說放假呢幾日都有單財經大新聞，就係突然有一堆熱錢流入港匯，觸及強方兌換保證，金管局幾次放水出去降溫。

　　另一邊廂，新台幣都升穿「四算」，台灣人呢幾日都講緊個笑話：4月1日有個香港人拎住1000萬港紙換左4200萬新台幣，日日吃喝玩樂玩左200萬新台幣，之後去到5月5日拎住4000萬新台幣又換返港紙……燈燈！都係換返1000萬港元，無多無少，賺左個TRIP。

　　點解突然咁多熱錢流入亞洲市場，通用解釋就係：美元逃難潮正式開始。美元指數係4月頭仲係102水平，然後一路跌跌跌跌跌，而家已經跌穿100關口，大約係99.8左。其實特朗普關稅戰開始之後，大家都睇到全世界似乎都唔賣帳、唔跪低，神州過去幾年疫情封關都係咁捱過去，到而家呢一刻關稅戰真係無所畏懼，日日照常咁生活，太陽照常係東邊升起。

　　至於花旗國，每日聽到新聞，唔係市民買唔起雞蛋、就係搶雞蛋嘅途中，有部分企業已經主動要求神州供貨，關稅由企業支付。唔知神州工廠有無供貨啦，不過好明顯睇得出侵侵搬起石頭DUMP自己腳仔，就算好痛好痛都出唔到聲兼表示：「無事啊！」

　　所以美元逃難潮出現，係因為投資者可能睇得出美企「無貨賣」，所謂美企又差、美股又跌、美債又話有危機，咁資金逃離都好正常，而投資者都唔笨笨的，將自己啲錢轉去嘅地方，必然安全。

　　至於港匯抽升，係咪又利港股？博客又唔敢講，因為可以齋換CASH唔買嘢都得，「貨幣」本身就係一樣投資/避險產品，只要港匯維持7.8，都係同美匯有關係，即係無乜關係、但又唔完全脫離關係嘅狀態。明唔明？唔係好明？外匯就係咁玄啦。
　　
《編者按》本欄搜羅即市傳聞，惟消息未經證實，《經濟通》亦不保證內容之準確性。

【你點睇？】特朗普宣布向全部海外製作電影徵收100%關稅，指可重振美國電影業，你認為措施能否起到幫助？► 立即投票