最近麥當勞賣舖一事，令大家都覺得香港樓市係咪進入「冰河世紀」；但另一邊廂，新盤開售又唔係情況太差，就算選址山旮旯，每轉開售都可以清到八九成甚至全清（當然你可以話，每一轉都係賣唔夠100個單位，梗係可以一Q清），現實就係有人要賣樓賣舖，但亦有好多人買樓買舖。

　　經濟低迷嘅時候，往往都係資產洗牌嘅時候，好多大孖沙高位唔識走，搞到而家左借右借，甚至被人清盤申請破產，但同一時間養精處優嘅新資金都會落場掃平貨。

　　剛剛差餉物業估價署數據顯示，今年6月全港私人住宅樓價指數報286.7點，較5月所報286.6點，按月微升0.03%，連升三個月，按年則跌5.2%；上半年累跌0.86%。

　　香港近呢半年來樓價跌幅開始有少少放慢情況，甚至有輕微反彈，其中主因博客覺得係HIBOR大跌，呢一點係吸引好多人入市，其次恒指已經上返25000點，經濟未必會即時顯現，但呢兩個信號可能想買樓人士嘅最佳信號。

　　所以話，樓市係咪遇上轉角？睇你係咪相信人棄我取。想從最低位撈貨嘅人，必須要係冒住大家謾罵嘅聲音入市。當大家打算買買買個陣，就應該係你離場嘅信號；當大家覺得經濟凍過雪櫃個陣，就係你入市信號。博客嘅投資理念往往都係同大家相反，姑且一年後博客再同大家分享多次呢篇文章，睇下博客眼光有幾準。

《編者按》本欄搜羅即市傳聞，惟消息未經證實，《經濟通》亦不保證內容之準確性。

【說說心理話】照顧者壓力大 情緒出現問題應找心理醫生！嘉賓：「雖然很貴，但是值得的，他救了我一命！」► 即睇