聽日就係《穩定幣條例》正式實施日子，博客同幣圈中人吹水，得出個結論係：如果穩定幣個規管咁嚴格，我不如用返銀行過數算啦。

　　其中有兩點值得注意，第一就係要實名制，即係幣圈所講的「KYC」，都係叫你渣住身分證影張相，然後打開眼合埋演打開口合埋口個堆驗證。幣圈玩KYC確實存在，但好多時候都係講緊你挖幣個陣要做嘅驗證，而唔係開戶／開錢包要做KYC，如果需要用到呢個技術，點解我唔用銀行俾cash就算？

　　第二就係「白名單制度」，即係你KYC之後，開個錢包必須俾晒所有個人資料，身分證住址、EMAIL，然後你就係呢個名單之中；你過錢只可以過俾同樣都係「白名單制度」入面嘅人，假如對方唔係白名單之中，你就會出現ERROR。

　　睇嚟香港證監真係好怕人洗黑錢，搞到一場大龍鳳，就係想監察資金流動；但加密貨幣興起，就係因為佢自由、方便，隨時想轉錢俾邊個都得。

　　其實唔緊要嘅，你起左呢套系統，咪睇下有幾多人用囉。搞咁大壇嘢，如果發現最後都係每日得一千幾百萬資金流動，個個走去用美國個套穩定幣，咪知道自己有咩問題。

　　博客都係用返現金銀行過數算啦，起碼唔使煩先。

《編者按》本欄搜羅即市傳聞，惟消息未經證實，《經濟通》亦不保證內容之準確性。

送禮活動浪接浪！想緊貼著數活動消息？即Like etnet Facebook專頁！► 立即讚好