葵青劇院｜《風車草黑心喜劇Di-Dar (Comeback)》終極加場 黃秋生首度挑戰載歌載舞演出　記歌詞記到忟

活動簡介

由風車草劇團主辦，《風車草黑心喜劇Di-Dar (Comeback)》，於2025年8月15日起假葵青劇院演藝廳公演，早前20場門票瞬間秒殺，一票難求，不少觀眾都在網上敲碗，希望能再加場演出，而今日終於有好消息，《Di-Dar》將加開2025年8月31日（星期日）晚上八時終極尾場。有關詳情如下：

《風車草黑心喜劇Di-Dar》(Comeback)

15-17, 19-24, 26-30.8.2025 [8pm]

16-17, 23-24, 30-31.8.2025 [3pm]

加開：31.8.2025 [8pm]
 
葵青劇院演藝廳
 
$680, $580, $480, $380
 
* 加場場次將於2025年8月5日（星期二）中午12時起於撲飛Popticket公開發售

網址：https://www.popticket.hk/event/di-dar-comeback

查詢電話：23899220

近日《Di-Dar》劇中演員：梁祖堯、湯駿業（Ahdee）、邵美君（阿君）、黃秋生、梁業（肥仔@ERROR）及何洛瑤（Sica）等正密鑼緊鼓加緊排練，但對於加場，眾人都表示十分興奮，亦十分感謝觀眾的愛戴與支持。《Di-Dar》早前贏得第33屆舞台劇獎最佳製作、最佳男主角 (喜劇 / 鬧劇)、最佳女主角 (喜劇 / 鬧劇)、最佳男配角 (喜劇 / 鬧劇)、最佳音響設計、最佳填詞及年度優秀製作共八個獎項，今次載譽歸來，身為監製的AhDee表示今次絕對是加碼演出，他說：「上次反應非常好，特別劇中嘅組合RIP有一part嘅歌舞，係全場high到不得了，有觀眾更自帶螢光棒變咗RIP嘅fans。今次再做，我哋將成part嘅歌曲換晒新歌，所以如果上次有睇過，今次會發現啲歌轉晒，而且我哋仲搵咗一個專門排演唱會嘅編舞幫我哋重新排過啲舞，我哋rehearsal跳第一隻歌已經索氣，你可想而知今次啲舞係勁咗幾多。加上今次有秋生同肥仔加入，秋生哥一早已經背晒台詞，一嚟到已經好似做過套戲。肥仔又估唔到佢咁鬼醒目，佢跳舞本身勁大家都知，加上佢肥嘟嘟好cute，出到嚟做佢呢個角色係咁啱數。」

劇中與秋生對手戲較多的阿君，今次首度與秋生交手，十分難忘，她說：「秋生哥係我哋演藝嘅大師兄，佢係第一屆，我係第十三屆。最初同佢排戲係好緊張，因為冇同佢合作過，佢嘅氣場都真係好勁，好有自己睇法，我呢啲師妹當然好驚啦，但係認真綵排，發現俾咩佢都接，所以發現喺台上面做戲時，就冇咗師兄師妹嘅分別，成個過程變得好enjoy好好玩，同埋可以反建議一啲提意俾師兄。」始終是喜劇，問到阿君可擔心秋生屆時會爆肚，她笑言：「我都有少少驚到時會唔同晒，但我係有訓練，上次葛民輝都係成日有新嘅點子，我係非常活潑嘅演員，所以即管俾啲嘢挑戰我啦！」

作為大師兄的秋生，竟然表示今次是一個大挑戰，他說：「我未做過又跳舞又唱歌，就連電影、電視劇都未試過，今次應該係第一次，對我嚟講係挑戰，同埋咁嘅年紀同啲後生仔玩下啦，睇下佢哋諗咩，睇下佢哋點樣排戲，走嚟學下嘢啦！真係㗎！點知記兩三句歌詞，都記咗三個禮拜，記到我忟憎。」那麼跳舞可有難到他？他直言：「我不知幾驚，次次嚟到又冇人教，就睇下隔離點樣跳，但佢哋話OK吖，幾好呀，我走嚟運桔㗎，後來睇返阿葛（葛民輝）嘅戲，又真係運桔咋喎，又幾好。運桔唔係唔好嘢，係好嘢嚟㗎，聽起上嚟唔識嘅，以為係負面，其實唔係㗎。」

同樣新加入的肥仔，入行後第一次演舞台劇，他都自爆十分緊張，但他自有方法減壓，他道：「今次做舞台劇點都有少少緊張嘅，因為有秋生哥喺度，佢都係大師兄，演技超班，開頭見到佢心情好緊張，但我又有一種敬重嘅感覺，所以影poster已經撩佢傾偈。好開心秋生會讚我：『呀！你呢個肥仔都跳得幾好喎。』第一下讚咗我，好似舒服咗，可以friend喎，跟住就開始同佢傾偈。我哋化緊妝嗰陣一齊聽歌，發現佢嘅品味幾好喎，係幾欣賞佢，合作起上嚟亦愈嚟愈舒服。而家同風車草keep住排戲嘅感覺係愈嚟愈好玩，成個劇太精彩，好多位好好笑，但認真嘅情感位置，我自己都乸住乸住，所以《Di-Dar》呢套舞台劇係一定要睇嘅。」至於上次有份參與演出的Sica，在台上表演側手翻贏盡掌聲，但今次她決定要將難度提高，她說：「上次《Di-Dar》有側手翻，今次重演呢啲招數實在係小絕，大絕嚟講會係一啲同信任有關嘅雜耍，平時大家喺陸運會會見到嗰啲，同跳躍有關嘅，我覺得大家睇到會『嘩！』一聲，入場嚟嘩十聲啦！」

《Di-Dar》一直打破舞台劇常規，除了將殯儀行業搬上舞台，今次重演更推出首本由舞台劇改編的《Di-Dar》漫畫及figure，而負責設計figure的阿祖介紹道：「我人生第一次設計figure公仔，係AhDee叫我畫一個公仔，做一個Di-Dar BB，然後就覺得不如畫我自己個角色啦！公仔嘅特徵同我一樣，都係鼻哥窿大，同埋充滿憤怒嘅眼神，另外仲揸住桃木劍同戲中收鬼用嘅五雷符，極度像真。」

《Di-Dar》周邊商品，現正進行預購，如欲選購，請瀏覽：https://www.wmgtheatre.com/category/all-products