九龍灣零碳天地｜六五環境日暨全民回收日嘉年華

活動簡介

各位老友鬼鬼注意！快啲預備好嚟「六五環境日暨全民回收日」嘉年華玩啦！

美麗香港環境節嘅「全民回收日」準備登場啦！本鬼今次親自出馬，邀請大家齊齊參與我哋嘅重頭戲一一「六五環境日暨全民回收日」嘉年華！

現場會有各式各樣環保主題攤位遊戲 ，包括 減廢回收、減碳知識、海洋保育…玩到唔停手！仲有精彩舞台表演，有SENZA A Cappella 、有歌有舞有表演，本鬼仲會親身坐鎮，分分鐘可以帶本鬼嘅分身（禮物公仔）返屋企𠻹呀！

完成任務，6月7號嚟現場，即場帶埋本鬼分身返屋企！點樣做？即睇：

1. 喺 2026年6月 1 日至 7 日 期間，去全港任何一間「#綠在區區」（包括「回收環保站」、「回收便利點」、「回收流動點」同埋智能回收箱），或者喺你屋企樓下嘅回收箱做好分類回收，記住為自己打個卡，影低回收過程

2. 同時喺 6 月 1 日至 7 日 期間，將你影低咗嘅打卡靚相／影片 上載至自己嘅社交平台同親友分享，並tag @大嘥鬼 及標誌 #全民回收。

3. 完成晒以上任務嘅朋友，6月7日嚟「六五環境日暨全民回收日」嘉年華（下午1時–6時），只要出示放有你嘅靚相／片嘅貼文或story記錄，並提供你嘅有效「綠綠賞」帳戶號碼。就有機會喺即場獲得「大嘥鬼掛飾連再生環保袋」一份（款式隨機，送完即止）！

每個帳戶只限換領一次。禮物數量有限，先到先得，送完即止㗎！