【特首選戰】我們在下一盤很大的棋

　　垃圾會日日上映垃圾戲碼，主席好似個波咁俾人拋嚟拋去，兩位民選幼稚議員面臨保皇黨不成比例嘅攻擊，快將議席不保，三權分立被強姦、甚至被左派輿論講到似有還無咁。

　　開始會期三星期，實質會議十分鐘，一項議程都冇推進到。保皇黨又過一關，但好快，佢哋要搞清楚佢哋保緊嗰個皇，係邊個皇，到時佢哋係咪真係咁企硬呢？

　　我好懷疑。

　　喺星期三當日，上晝大家仲睇緊梁君彥幾咁無力控制亂局，下晝全城精力都集中喺一條消息。消息係咁寫嘅，有「估唔到的重量級法律界人馬」會喺日內宣布參選特首，呢幾個詞語加埋一齊，引人入勝，特首選戰，就係靠呢單料揭開序幕。

　　一出呢條消息，小小驚訝網上冇人大鬧匿名匿到咁，反而唔少人都猛咁估係邊個，香港人經過呢幾年嘅「洗禮」，已經發展到當有任何人可以打敗梁振英，而佢又肯行出嚟打敗佢，已經好開心。只因，喺梁振英治下嘅香港實在太痴線。

　　呢位法律界人士，最後揭盅係退休法官胡國興，佢最為人知曉係曾任選管會主任，以及高等法院上訴庭副庭長。民間輿情一致表示高興，評論界就分兩極，有啲人估佢係好似1996年嘅楊鐵樑翻版，亦有人認為佢出選係代表正義嘅聲音。睇完佢個記者會，似乎胡官真係未有一套管治方略，重點係以佢多年出任法官嘅身份，可以獨立、公正咁處理紛爭，呢個係佢最大嘅賣點。

　　冇錯，以前，佢係一個可敬嘅法官，今日，佢係一個可愛嘅老人家，你睇佢噚日記者會，氹到啲記者幾開心就知道，但從佢嘅對答，唔容易說服到我，佢係有備而嚟。反而，佢似係舖路俾其他參選人，因為佢出嚟聲稱參選嘅客觀效果，係壓住689呢排意圖借司法機構反港獨嘅氣焰，醉翁之意不在酒，胡官從退休法官身份，搖身一變成為梁振英嘅挑戰者，由佢去講出「特首都入稟，好唔好睇」，效果勝過其他挑戰者去講十萬倍。如果背後真係有操盤人，呢步棋行得好靚。

　　同1996年選舉唔同嘅地方，就係今次仲可能有曾俊華。需知道，曾俊華係梁振英一手捧出嚟。呢四年嚟，梁振英最大嘅政績，就係令同班子裡面，一個原本被視為唔太做嘢嘅人，逐步進化成為萬人迷。自己就犯眾憎，走漏個鬍鬚曾。

　　老老實實，曾俊華近期嘅表現，曾一度令我懷疑，佢已經唔想選特首，因為佢講啲嘢太真心，當佢嘅BOSS入稟法庭要求頒令梁頌恆游蕙禎喪失議員資格，佢自己就停留喺要求佢兩個道歉嘅層次，冇緊跟BOSS所拜倒中共某一條派系嘅line to take。

　　根據《香港01》報導，剛過去嘅星期日，佢出席港大活動時，仲同學生講話，三權分立應該要保持，後生仔有權叛逆。喂大佬，你講咁多真心話，立場咁香港人，北京點會鍾意你呀！？多方消息都傳出曾俊華已經去信中央表明會參選特首，田北俊亦都證明事實，咁就代表，講真心話嘅曾俊華代表住北京另一個利益陣營，將要同梁振英做連番惡鬥。亦都勢估唔到，火藥味喺星期四一日內就散發到極致。先有塘邊鶴葉劉係度酸葡萄，提供娛樂俾廣大港民。

　　梁振英就真係有備而嚟，佢亦都展現佢除咗其他嘢一事無成，喺玩政治手段，係確有一手。噚日佢見記者時，話「希望同事能夠責無旁貸，心無二用」一拳打落去曾俊華度先。有人聞到酸臭味，但佢嘅回應其實一啲都唔酸，反而非常高章。689跟住就羅列一堆反問句，個意圖相當明顯，就係要為呢場選舉定調，要成為一場「港獨 VS 反港獨」之爭，而落注俾佢本人，就係反港獨嘅最大表忠。佢自己道出咗一個事實，「港獨派興起，梁振英最開心」。因為呢個成為佢「有力打擊」港獨派嘅籌碼。由冇，講到有，撩到人哋想真做。再以此成為打壓嘅籍口，集權嘅先聲，佢係差在未講埋呢句出口，「曾俊華，你靠攏本土，係咪想搞港獨同我打對台？」

　　曾俊華面對嘅問題，係一個撕爛咗嘅香港。佢一直嘅言行，都顯示佢係建制入面嘅鴿派。曾俊華係咪有決心俾香港食住嗎啡止痛，然後等傷口慢慢癒合？抑或只係糖衣毒藥，回復曾蔭權時期嘅慢性死亡？呢個係佢要面臨嘅重大考驗，因為係喺黑暗中，有好微弱嘅螢火蟲照亮一下，抑或沉落去更深嘅谷底，就係睇呢舖。

　　但其實講咁多，呢場選舉，始終係我哋香港人無份參與，感覺同睇美國大選唔係差太遠，大部分人都係喺facebook跟進最新消息，再多明戰連場，暗箭互射，除咗食花生，我哋仲做得啲乜？