【市儈男出沒注意！】男人老狗，點樣先可以度縮過小學生？

　　玄米米踏出咗社會話長唔長、話短唔短，都同過唔少男同事相處。而最近就真係對公司一位男同事嘅做人方法為之側目。話晒大家已經係工作中嘅成年人，仲要係中環嘅專業精英（自認為），有時錢銀上四捨五入、去除零頭方便計數乃屬閒事，但呢位同事永遠只會「有著數就扣零頭、無著數就追到你無得抖」！呢種男同事，你又忍唔忍受到？ 

事件一 

　　忙到無時間出去食晏係好多打工仔經常遇到嘅事，有次市儈男就同大家一齊嗌外賣！好喇，外賣到咗，總會有個類似秘書嘅同事負責收錢、派飯。點知堂堂一個成年男人竟然話銀包得$20，話差秘書同事$28先喎！秘書同事經歷過咁多風雨，再加上科技發展一日千里，想走數？無咁易！ 

　　「阿Sam，一係你download呢隻App，㩒幾個掣加我做friend就可以喺信用卡過錢畀我，好簡單架咋！因為我怕人多條數會亂啊！」 

　　點知！市儈男一下四兩撥千斤，將條數推返落秘書同事身上！ 

　　「咩App啊？唔好啦！我唔想用信用卡，我想現兜兜畀返現金你，咁我見到銀包越嚟越少錢就唔會亂用。下次我幫你返買早餐啊！」（你銀包根本無錢囉！） 

　　嘩！你講到咁，錢又無，信用卡又唔肯用，即係瀨死要幫你出住先啫！ 

事件二 

　　先輸一局嘅秘書同事無理硬蝕$28畀佢，就約咗市儈男某日一齊買早餐，諗住佢識自動波還錢啦！唔使問，市儈男再下一城！原來當日二人相約買快餐店早餐，排到秘書同事時，市儈男輕輕一推，示意要秘書同事行先，點知秘書到達counter，再擰轉面時，市儈男已經去咗另一個counter分開買！「說好的幫你買早餐呢？」秘書同事自費後立即行去市儈男身旁，講笑咁講：「啲散紙而家用晒佢，你差我$28一陣畀啲紙幣我就啱啦！」市儈男竟然笑而不語？咁即係點？還錢呢？最後，就變成如今秘書連輸兩局嘅賽果！ 

事件三 

　　男人老狗，身壯力健，都少不免有機會幫大家買嘢飲或下午茶嘅。市儈男緊係採取「先收錢、後買嘢」嘅方式。你知啦，物價通漲，有時餐廳加咗價都唔知，但餐廳加價，又加得幾多呢？市儈男幫同事畀左幾蚊差價後，竟然要求同事「一手交錢、一手交貨」！爭佢幾蚊就追到人甩褲，但相反佢爭人錢，就瘋狂耍太極，「符碌」碌過就算！

　　遇上此等市儈無品之輩！各位無需再多顧忌或畀面！呢種人，你要日日追！佢越唔畀，你就越要追返！當全世界都知道市儈男的惡行後，你就唔會覺得開聲問佢追返錢係尷尬之事！