如何擄獲「潮男」心？ 莊學山教路只需一招即到手

　　除咗剛退休嘅香港首富誠哥係人所共知嘅「潮人」之外，政商界都一向十分「潮」架！講到團結「架己冷」可謂無得輸，話說Jenny今日就去咗「潮青」嘅午宴，大家唔好以為入面好多潮州來嘅「小鮮肉」啊，係冇嘅！咁究竟搞咩鬼呢？其實係「第十屆國際潮青聯誼年會」久違廿年之後再由香港主辦，當然要隆重其事，Call齊各界「潮人」力撐啦！

Jenny喺莊生(前排右一)身上真係學咗唔少嘢!

小鳥依人Work唔Work？

　　Jenny一入會場就見香港潮州商會青年委員會永遠名譽參事莊學山，即刻同佢傾幾句先，莊生自己都講笑咁同Jenny講，咪睇佢一把年紀，平日好鍾意同後生仔傾吓計，保持心境年輕之餘，又順道教下後輩做人嘅道理。

　　佢仲即時過咗兩招畀Jenny，教小妹點樣可以擄獲「潮男」嘅心，姊妹們聽住喇！就係……「喺外人面前畀足面對方！」莊生話，現代女性愈來愈叻係不爭事實，但在「潮男」面前最好就扮演得小鳥依人啲，有咩彩都畀個男伴拎，咁男友／老公就會對你死心塌地喇！只要出面攞到彩，返到屋企女友／老婆就可以話點就點！

「潮佬」帶「潮青」 大灣區兩日遊

　　當日嘅「潮青」，今日已經成為「潮佬」，莊生係第一屆國際潮青聯誼年會嘅會長，佢講講吓都大讚當年一班「潮青」包括現任行會召集人陳智思等等，都會齊齊落手落腳搬枱搬櫈做嘢辦活動，可謂另一種嘅「無大無細」。

　　今屆聯誼年會由港區人大代表張俊勇（Thomas）做主席，一於緊跟國策，點少得去考察吓「一帶一路」同埋「大灣區」呢！Thomas話年會決定以「共建潮青命運共同體」為主題，26、27日帶埋國內外「潮二代」、「潮三代」（今次係真．「潮青」）參觀廣州、南沙、深圳、東莞及前海等地嘅「大灣區」重點發展項目；之後再搞一系列論壇同交流會，講吓共享經濟同創科。可惜Jenny有公事在身唔可以隨行，如果唔係識返幾個「潮青」，諗起上來確實唔錯啊！