【見工必睇】CV石沉大海、連面試機會都冇？五條問題自測CV吸睛度

　　一份得體CV有助增加見工的成功機會，要懂得評估一份CV是否「靚仔」，先問自己以下5條問題，如果「咁好彩」中3題或以上……建議你寫過另一份CV。

1.　工作摘要（Job Summary）係咪要長過6句？

　　係呀！點算好？減少1-2句為妙

　　吸睛位︰Job Summary務必要先聲奪人，具體列明專業資格和個人專長即可。另外，內容應以「老闆為本」，建議求職者從公司角度出發，簡而精地說明個人對公司可作出的貢獻。

2.　 簡介部分係咪多過（或少過）3項軟技能？

　　係呀！點算好？盡量以3項為宜。

　　吸睛位︰軟技能如溝通技巧、組織力等一般較「虛」，量太多反而嫌「水分過高」，削弱求職競爭力。建議取中庸之道，加入適量的「專業硬件」Balance一下，做到軟硬兼備。

3.　係咪唔明咩係「專業硬件」？搵唔到「專業硬件」？

　　係呀！點算好？再諗真啲！

　　吸睛位︰「專業硬件」泛指專業知識及易於量化的技能。近年熱門之選包括：數據挖掘及分析、資訊系統管理、SEO/ SEM營銷等。

4.　 CV內容係咪照抄招聘廣告中的職位描述（Job Description）？

　　係呀！點算好？改寫囉！

　　吸睛位︰係就係話要投HR所好，按招聘廣告「照單執藥」。不過要留意，求職者應針對應徵職位的要求，精選相應的技能和經驗為關鍵字，而非純粹搬字過紙。重點字眼︰「Hands-on experience with Statistical Analysis and Data Mining」、「Experience with SEO/ SEM Marketing」等。

5.　係咪CV每個部分都超過6個Points？

　　係呀！點算好？減囉！多字好「趕客」。

　　吸睛位︰建議將性質相近的經驗和成就歸類，整合為一。至於日常「濕碎嘢」，如影印、追單等「手板眼見」工夫，就不用多加描述。

　　無論是做Appraisal，抑或見工面試，要成功爭取加薪，記住留意〈講錢傷感情？開口加薪6要點〉！