今時今日仲講收視率／收聽率？Out咗喇！

　　如果想知一個節目受唔受歡迎，上一代嘅指標就係睇收視率同埋收聽率，Jenny呢一代就係根據網上嘅Hit rate嘅！所以大家記得㩒多幾次呢個專欄條link喇！

　　咩節目Hit rate有保證？

　　講起節目，呢排社會最受大家關注嘅「節目」，就梗係修訂《逃犯條例》喇！此題一出，無論係收視率定Hit rate都係有保證㗎！而立法會今日就《財政預算案》恢復二讀，首先就講到冇修正案嘅33項總目。不過本身議員只能就預算案提出削減，但係就無權提出增加撥款嘅修正案，所以唔少議員就喺呢一Part到講返一啲係想加資源嘅部門。

　　咁關收視率咩事呢？原來今日人民力量陳志全（慢必）就話，政府曾經話港台嘅節目冇人睇，但係政府又唔加多啲資源落去，咁「巧婦難為無米炊」，又點做到多啲好睇嘅節目呢？佢又指，港台唔怕得罪大財團，亦都唔驚政府，仲話其實平時直播立法會會議嘅港台32台都有好多人睇，而上次立法會都冇直播嘅法案委員會會議（即係泛民照開嗰個），32台都有直播，有唔少人收睇添！

　　時代變緊喇～

　　慢必就話，而家其實淨係得港台會做收聽率數字報告，商營電台都唔會做，因為時代喺到變緊，「而家TVB最高收視都係27、8點」、「以前喺亞視都有18點啦！」所以喺呢個年代，已經唔應該用收聽率報告去衡量喇！Jenny就諗起之前民建聯主席李慧琼（琼子）都話係街到有街坊認到佢成日喺電視出現，咁其實都要多謝港台成日直播立法會事宜喇，話晒政治人物同演員一樣，一定有人鍾意有人討厭，但點都好最緊要係有人識呀！that’s why 有句說話：「唔怕壞新聞，最怕冇新聞」！