蒙面法禁絕了人，禁不了心

　　上星期林鄭先擺出一副溝通總比對立好嘅形態，點知轉個頭上完京師賀阿爺生日返落嚟後，又話要急急腳透過緊急法立《禁蒙面法》。執筆之時仲未公布立法內容，但多間電子媒體都已經講到言之鑿鑿，相信呢篇稿見街之時，大家出街戴個口罩隔下沙塵，都要諗清諗楚究竟自己有無犯法。

　　一講話立蒙面法，好多評論都已經話無乜用，特別係前線勇武嗰批，連人地鋪頭都夠膽大肆破壞，暴動罪都可能坐十年，又點會怕你蒙面法嗰一兩年？有媒體就引述政府消息指，蒙面法係要針對一班和理非，令佢地唔敢出嚟做後盾、做救援，截斷對勇武嘅支持，希望咁樣可以暫時停止愈來愈亂嘅局面。

　　蒙面法或者可以短時間內收到一啲震懾作用，令到和理非唔敢再行喺勇武後面，但用緊急法去定立蒙面法，畀到反對者最大嘅信息就係，政府唔係要溝通，係要對立到底，令到反對者有「禁到我個人、禁唔到我個心」呢個想法，先係最核心嘅問題。

　　民建聯係蒙面法嘅主力推手，有民記中人亦都承認，蒙面法只係治標，絕不能治本，呢個時勢今日唔知明日事，蒙面法出爐係好係壞都真係無人知，但唔做的話就連買時間解決問題嘅能力都無，對林鄭來講都係無辦法之中嘅辦法。不過Tina都問民記中人，明明林鄭之前都死口話唔諗蒙面法，點解上完京之後會180度轉變？民記朋友就話：「面聖完林鄭一條計仔都度唔到畀阿爺，你覺得佢仲可以點？」

　　難為Tina上周五仲抱有過一絲希望，林鄭係會用對話方式解決今次困局，點知Tina同想當年一位女星一樣「好天真、好傻」。