香港新式街頭騙案，你又遇過幾多次？３－內地「假」旅客

　　街頭騙案年年都有，而且愈來愈新、愈來愈多花款，究竟你又遇到邊幾款？原來騙案隨時隨地都可以發生，所以【騙局大拆解】一連三集，同你剖析騙局。

內地「假」旅客，問你拎錢拎嘢食

　　呢個騙案相信好多人都曾經有過經驗，就係突然有一至兩個操普通話、聲稱自己係內地旅客，周圍問人可唔可以拎一百幾十蚊搭車返酒店，之後問你拎聯絡電話，話會畀番錢你；如果你唔畀錢佢，佢就會問你可唔可以買啲嘢食畀佢，話自己好耐無食過嘢，求你幫幫手。

　　相信有唔少人應該中過招，不過筆者曾經有過一個經驗，有個騙徒同樣話自己無錢搭車，當時筆者話不如幫你叫架警車車你返酒店，騙徒立即大叫：「你都黐線！」擺明就係被人識穿。呢類騙徒喺疫情期間幾乎絕跡，但近期通關之後又開始出現，所以奉勸各位市民，見疑即報！

撰文：李皆穎