《小傳日記》iPhone Duo驚喜登場惟有小缺憾，大嗱嗱萬七蚊到底值唔值？

　　《小傳日記》蘋果終於都推出第一款摺機iPhone Duo，之前傳聞售價要去到2萬以上，真係嚇死人，好彩最低配版本香港定價17499蚊起，同小米(01810)摺機最高配版本售價差唔多。手機愈賣愈貴，但設計就愈來愈冇新意，究竟iPhone「一變二」到底又值唔值得果粉換機呢？綜合各大科技媒體嘅首輪評測，評價普遍比預期正面，尤其係摺痕、鉸位手感、開合動畫、同埋為摺機重新設計嘅iOS介面，都得到唔少讚賞，不過花款愈多排版愈痛苦，難為全球軟件工程師又要開OT執靚個App喇。

　　iPhone Duo外型方面採用咗類似護照嘅寬體設計，書本式左右攤開，合埋係5.4吋外屏，係iPhone 18 Pro嘅90%；攤開就有7.6吋無縫大屏，比18 Pro Max大50%。機身打開得5.2mm厚，仲薄過上年嘅iPhone Air(5.64mm)。邊框用5級鈦金屬加高光鏡面拋光，有星光白同夜空藍兩色。

　　講到摺機大家最擔心嘅就係摺痕同鉸位，現場媒體評價同YouTuber嘅上手片睇到，當屏幕著嘅時候，正面同側邊都好難見到中間條摺痕，要扭到「死亡角度」先勉強睇到。有媒體直頭話係「目前測試過摺痕最淺、處理得最好嘅一部」。不過，當屏幕熄咗、環境光一照，中央摺疊區域依然隱約見到；YouTuber實測用手指摸都仲感覺到少少凹陷，只係冇早期摺機咁誇張。其實，蘋果並非從鉸鏈結構解決摺痕問題，而是透過納米紋理磨砂塗層「遮蔽」反光。

　　軟件方面，iOS 27亦為iPhone Duo做咗好多優化。外屏嘅任務欄喺右側，更適合單手嘅使用習慣；打開嘅時候系統唔係硬生生將外屏畫面拉大，而係做一層動態模糊、半透明過渡，外屏內容好似玻璃咁流去內屏，睇起身十分舒服；並且即使打緊遊戲，從外屏切換到內屏都非常流暢，唔會窒住窒住。7.6吋大屏可以左右雙開App，一邊睇YouTube 一邊Message傾計。如果將佢摺成L型擺喺枱面，下半屏會自動變身虛擬鍵盤，似部迷你手提電腦；而如果將佢半摺成A型立喺檯面，iOS 27嘅StandBy會用向外嗰塊屏顯示出時鐘、日曆、天氣、相簿等等，直接化身為全天下最昂貴嘅鬧鐘。

　　不過講到尾，呢部天價手機最令人頭痛嘅唔係摺痕，而係用家要為咗摺mon放棄做iPhone攝影大師嘅夢想。機背只得兩支鏡頭，冇獨立嘅長焦鏡，而所謂2x變焦都只係主鏡頭裁切。如果平時有需要用手機影演唱會、影打卡美照嘅朋友，呢部機就唔多實用。除此之外，蘋果仲將Face ID攞走，改返喺側邊電源鍵用Touch ID。雖然官方話方便合埋打開都解到鎖，但對用咗接近十年Face ID嘅果粉嚟講，使用習慣上就唔係咁習慣。

　　目前市面上都係對iPhone Duo正面評價較多，但說到底，呢部機要到10月23日先正式發售，半年後個鉸位耐唔耐用、內屏會唔會漏液、電池頂唔頂到一天，現階段係未知之數，不過唔緊要，神州影視科技自媒體頂流「影視颶風」已經宣布「每人一台iPhone Duo」，連實習員工都有份，到時就可能知道iPhone Duo究竟抵唔抵deal，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。