《魚缸博客》內地消費降級，「樂爾樂」超市殺出重圍兼部署來港上市！

　　《魚缸博客》內地近年來開始流行「消費降級」，總之一個字：「平！」所以唔少實體鋪都開始執，由電商話事，因為電商走量所以壓到價格好低，加上而家物流發達，反正消費者到手平過落街買。

　　不過近年來內地有間超市跑出，甚至搵錢犀利過「胖東來」，呢間超市叫「樂爾樂」。香港人未必聽過，但人地已經開鋪開到去東南亞，佢都係靠住一個字：「平！」但點解會做到咁平？你就未必聽過啦。

　　第一，佢開鋪專門搵窮街冷巷，鋪租有咁平得咁平，壓縮租金成本；第二，佢開鋪從來無冷氣，四十度高溫都係話知你，壓縮營運成本；第三，佢從來都係搵工廠直接拎貨，省卻代理商，係壓縮商品成本；第四，你以為佢賺賣貨錢？錯啦，佢九成都係加盟店，係內地做到幾千店規模，同廠方拎貨量夠大，係價格上可以有談判空間，拎到平價貨俾加盟店，不賺差價，務求做到有咁平得咁平。

　　博客估計，佢實在並唔係賺賣貨錢或者係差價錢，純粹係賺加盟商每年嘅加盟費，只要佢規模有百億以上，每年嘅只要有幾個十幾個巴仙純利，都淨賺十億。

　　有趣嘅係，佢拎住呢套模式走去上海開鋪，就遭遇到滑鐵盧，因為呢種一線城市除左要求買貨之外，仲需要有「消費體驗」，所以無冷氣呢下真係好難搞；但佢係二三線城市係絕對強者，甚至可能平過係電商買。

　　點解而家咁多實體鋪執，某程度係中間商賺取差額，令到貨價無辦法同電商比較；但假如省卻呢重收費，做到甚至比電商價格更平，老實講句，博客唔介意無冷氣，拿拿聲買完拿拿聲走，如果可以一蚊買到支水，兩蚊買到排電池，而且貨源同大店舖一樣，某程度都係一種「福利」。

　　據聞佢而家部署來港上市，如果真係，博客到時研究下佢盤數，再同大家解密！
　　

《編者按》本欄搜羅即市傳聞，惟消息未經證實，《經濟通》亦不保證內容之準確性。