《魚缸博客》興發街嗰間Esprit，轉左去記利佐治街再開啦！

　　當川久保玲同山本耀司都已經停戰，o者o者ARMANI(Giorgio Armani)都係今年9月頭逝世，原來興發街嗰間Esprit，轉左去記利佐治街再開啦！

　　你以為博客講緊歷史？其實Esprit真係再開返，消息指潮牌2%創辦人已經取得Esprit獨家經營權，並預告將會係今年銅鑼灣Fashion Walk分店將會開幕。連DJ主持人林海峰都係自己FACEBOOK到話:「開番喺銅鑼灣？我有時間返part-time幫手摺衫㗎！#永遠懷念興發街嗰間ESPRIT」，仲大SHOW自己當年返工張員工證。

　　所以話，潮流呢家嘢真係輪流轉，十幾年前思捷環球(00330)，計及埋供股合股，股價升到八百一千蚊，比起呢期LABUBU有過之而無不及，潮牌潮到一人一件，同埋影響到不同的次文化，軟硬又出歌、財經又歌頌；十幾年後今日股價得個位數的「死股」，今次重開會唔會對股價有刺激？博客真係唔識答。

　　而家經濟都算係下行當中，仲有幾多人肯買潮牌真係未知之數，如果好似A BATHING APE咁買一兩千蚊件，咁博客真係祝你好運囉。

《編者按》本欄搜羅即市傳聞，惟消息未經證實，《經濟通》亦不保證內容之準確性。