《楠楠自語－莫灝楠》買細價股技術含量高，做ｓｔｏｃｋ　ｐｉ…

　　《楠楠自語》最近Ｄａｖｉｄ　Ｗｅｂｂ又出聲，狠批包浩斯（００４８３）寧願用８３２
萬買樓都唔派息，三年冇分派任何股息，直斥「可恥」。佢作為第二大股東，仲公開質疑管理層
買樓係咪為某人特別準備，連非執董都唔出聲。你話，連佢咁有份量都要靠公開信施壓，咁我哋
呢啲小股民仲有咩話語權？
　
　　雖然我頭髮長，但實在無「股壇長毛」嗰種為小股民抱打不平嘅抱負╱理想。香港股市，食
得鹹魚抵得渴，你買得港股仲要係細價股就預左好多呢啲野。當然我唔否認咁樣係賺到錢，但係
技術含量實在太高。你唔係好似Ｄａｖｉｄ　Ｗｅｂｂ咁，坐埋入去董事局，根本就唔會知發生
咩事。大把股票平，但唔係平、夠直搏率就可以買。大把估值好平嘅股票升到中間，無端端同你
講政府監管，反壟斷；管理層出事，穿櫃桶底；被沽空機構狙擊，做假數；賺到錢唔肯派息，唔
回購仲要供配股。你做一個ｓｔｏｃｋ　ｐｉｃｋ之前，係要連呢啲因素都全部計曬入去。宏觀
經濟吹水固然好聽，但可以宏觀經濟好好，你隻股票郁都唔郁。咁我睇到咁遠做乜？我係買緊隻
股票，唔係買緊個ＧＤＰ。
　
　　過兩日再講下點解要做Ｂｏｔｔｏｍ　Ｕｐ。《南華金融集團副總監　莫灝楠》
　
＊《經濟通》所刊的署名及╱或不署名文章，相關內容屬作者個人意見，並不代表《經濟通》立
場，《經濟通》所扮演的角色是提供一個自由言論平台。