《小傳日記》京東撩戰美團東哥落場作騷，外賣遲到係邊個嘅錯？

　　《小傳日記》近排京東（０９６１８）真係動作多多，前有喺旺角租巨型廣告「挑機」豐澤
，後有與ＨＫＴＶｍａｌｌ撩交打，喺國內亦要踩過界，燒錢搶佔外賣市場，同餓了麼以及美團
（０３６９０）競爭，神州外賣平台重返三國時代！
　
　　京東點解揀送外賣，其實都好易理解，因為物流運輸就係京東嘅老本行，可以送文件送快遞
，自然都可以送外賣。但係外賣平台嘅營運邏輯比快遞，尤其係對時間把控方面，一般打工仔只
有一兩個鐘嘅寶貴ｌｕｎｃｈ時間，如果外賣遲到，或者食物凍晒，顧客就會「一次不忠百次不
用」。
　
　　京東最近就遇到呢個經典問題，而為咗挽回消費者信心，一於大手筆宣布「所有遲到２０分
鐘以上嘅訂單一律免單」，計下數先，有報道話神州日均配送的訂單量高達８０００萬單，當京
東佔咗市場一成，亦即係一日８００萬單，假如平均每餐１５蚊人仔計，如果外賣遲到率達到
５％，咁每一日就要用６００萬銀，一個月就要駛走１﹒８億銀，認真花錢如流水。
　
　　對於外賣遲到嘅問題，京東就通過一封公開信，不點名批評競爭對手逼兼職外賣騎手「二選
一」，令平台騎手流失，所以先會遲到，公司又承諾全職騎手規模會從５０萬人擴大到１００萬
人。呢封公開信「戰狼」味十足，京東再用最長嘅段落列晒對手嘅「五宗罪」：「冇繳納五險一
金」、「算法壓榨騎手」、「騎手事故率高」、「侵蝕餐飲商家利潤」、「食安問題」。京東將
罪名一列出，即刻將商業鬥爭升級到社會責任層面，一舉搶埋道德高地添。
　
　　劉強東熱衷打造「員工如兄弟」人設，公司文化都帶啲江湖氣，連公開信都寫到似江湖尋仇
咁，佢批評對家強制外賣騎手二選一，唔記得老祖宗講過嘅一句話：水能載舟亦能覆舟，仲話希
望對方好自為之，早啲回頭是岸！」。網上搞完大龍鳳，線下劉強東都親自出馬，著制服踩電動
車送外賣，夜晚仲請騎手打邊爐添。
　
　　不過美團噚晚即刻反擊，ｐｏ出一份聲稱係京東「秒送小隊」嘅聊天記錄，踢爆京東先至係
唯一逼騎手「二選一」嘅公司，仲ｓｈｏｗ埋騎手群對話、京東派單記錄同京東扣款記錄，話京
東俾騎手嘅送餐時間短到離譜，超時就罰大額，高達４００人仔，仲要成日將啲唔順路嘅單綁埋
一齊派，搞到冇乜騎手肯做。
　
　　喺歐美生活過嘅朋友都知道，外賣送餐絕對係一項奢侈嘅服務，與其畀配送費同小費，倒不
如直接開車出去食飯。筆者唔認為配送費貴係生活成本高低嘅問題，而係食物配送本身就應該係
一項高昂嘅服務，你喺香港坐的士都２９銀起錶啦，試問當一個騎手踩電單車兩三公里，就係為
咗幫另一個人運送外賣食品，又點止值個位數字？當中除咗涉及騎手嘅辛勤工作、人身安全以及
油錢之外，仲有每程大概半個鐘至一個鐘嘅時間成本，而喺神州一程４蚊、５蚊嘅配送費，又點
好意思要求騎手使命必達，次次都準時？請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。