《小傳日記》閩浙贛三省古代科舉場得意，未來科技界同樣可期？

　　《小傳日記》關稅陰霾暫時消散，魚缸焦點回歸基本面。近日魚缸焦點之一莫過於正在香港
招股上市嘅寧德時代（０３７５０）。寧德時代喺禮拜一（１２號）開始招股，綜合多間券商數
據，截止今日中午，寧德時代已獲券商借出１５６９億銀孖展，以公開發售額２３億元計，超購
約６６倍。雖然招股將會喺聽日（１５號）中午截止，但就算呢兩日點熱烈，超購升至過百倍，
但比起茶飲股蜜雪集團（０２０９７）年初戰績，超購５２５７倍，凍資１﹒８２萬億銀來講真
係小巫見大巫。咁又唔意外嘅，事關寧德時代上限招股價較上周五Ａ股收市價僅有１﹒６％折讓
，股價唔算吸引。所以，招股反應不算特別熱烈。
　
　　講起寧德時代，筆者近日睇到一個有趣嘅短視頻，該視頻博主提及寧德時代老細曾毓群。博
主話福建省出咗三大巨企老闆，分別係字節跳動（抖音母企）嘅張一鳴，美團（０３６９０）嘅
王興，同埋寧德時代嘅曾毓群，由於張一鳴和美團業務發展重心都唔喺福建。因此，兩大企業嘅
崛起對福建無太大意義。惟有寧德時代嘅崛起，帶動曾毓群家鄉寧德市，從福建省最落後嘅城市
發展成為省內躋身五強、全國躋身百強嘅地級市。因此，曾毓群以及寧德時代嘅崛起對福建省來
講意義非凡。
　
　　博主要表達嘅當然唔止呢啲，佢後面講嘅嘢更有意思。佢話，未來神州科企界將會出現三大
省幫，包括以阿里巴巴（０９９８８）為首，宇樹機械人和ＤｅｅｐＳｅｅｋ等組成嘅浙江幫；
以字節跳動、美團同寧德時代為代表嘅福建幫；同埋以發展人工智慧晶片嘅寒武紀（創辦人陳天
石為首，Ｍａｎｕｓ　ＡＩ?业者肖弘等人為代表嘅江西幫。佢認為江西雖然喺改革開放嘅大潮
中起步較晚，但江西近年喺科技發展方面具備一定基礎。唔單止軟條件，就算硬條件都唔差，事
關江西仲有鋰礦和稀土等豐富資源，加上位處長三角同珠三角之間，將來發展潛力同樣無可限量
。
　
　　只不過，現時內地科技發展遍地開花，尤其走在改革開放前沿，處於長三角華東嘅江蘇，同
華南嘅廣東，甚至華中嘅湖北，西南嘅四川都唔弱。點解博主只提浙江，福建同江西三省？唔通
係因為博主本身係江西人，而家又住喺福建省，加上浙江省又的確係現時神州科技界中行得最前
一省，所以博主先提呢三個省？原來唔係咁簡單！博主認為，浙、閩、贛三省除咗同處中國東南
方，彼此緊密相連之外，呢三個省仲係中國歷朝出最多進士嘅省份，說明來自三省嘅子弟自古以
來都係勤奮好學嘅模範生。既然佢哋可以喺古代科舉出人頭地，自然亦可以喺現代科技大展拳腳
。筆者聽落，又好似好有道理咁！當然，博主講嘅來自呢三個省嘅人，唔一定誕生於呢三個省嘅
科企。而家人才全國流動，未來呢三個省嘅子弟會唔會真如博主所講，喺神州科技界大放異彩，
就請拭目以待！請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。