《小傳日記》神州谷科技谷到要拆牆？炒完就算咪太留戀！

　　今日恒指再之挑戰企業穩20000大關，其實近日孖屐都明顯心大心細，阿侵五時花六時變，而家好似針對中國無咁大力，但都唔知以後會唔會突然反面。但今日嚟講。孖屐又好似勇敢返啲，事關阿爺疑似又推新質生產力。

　　今日一堆科技股忽然爆升，氣氛好到帶動埋恒指重上20000。爬返全日新聞，主要都係升啲AI股同埋通訊設備之類，好似隻長飛光纖(06869)今日真係識飛咁最多升過三成，AI方面就係優必選(09880)、金山雲(03896)同第四範式(06682)之類跑出。

　　上個月底上海印發《上海市推動數字貿易和服務貿易高質量發展的實施方案》，雖然已經出咗幾星期，但疑似呢幾星期都無乜關注度，所以今日經打手推一推，孖屐先醒一醒留意阿爺係唔係開始做緊嘢，而以今日嘅炒法嚟，可能已經行動咗都未定。

　　《方案》入面都幾多行動，其中提要「推動外資全資互聯網數據中心」以及「吸引外資開展互聯網接入服務」，正正就係今日炒起嘅一個要點，神州有人解讀呢兩句可能意味住阿爺為谷科技，打算要解禁返Facebook、Instagram同Google之類嘅西方社媒，帶動AI類股份跟升。另外《方案》入面又講到要「加快構築以5G網絡和光纖寬帶網絡為代表的新型信息通信基礎設施」、「推動臨港海底光纜登陸站建設」，所以隻長飛光纖呢兩日股價起飛。

　　呢期孖屐觀望，其實就係為咗睇阿爺對特朗普有咩應對措施，目前為止消息面上對外傾咗電話氹著咗侵侵，對內又繼續力谷新產生產力，假如真係解禁FB同Google，都算係一項幾重磅嘅消息，咁就真係值得今日咁炒法，不過你話可能性幾高，？筆者覺得就幾低囉，當年朱克伯格喺北京晨跑做人肉吸塵機，一樣換唔到FB解封，今時今日神州喺國際輿論形勢更加艱險，所以有乜理由今時今日會局部開放番先？今日升市都係未過20100阻力，氣氛上好啲但疑心仍在，睇怕阿爺真係要再出多兩錢肉緊先得，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。