《魚缸博客》五窮六絕七未必翻身，恒指將迎來一波收割潮

　　今日恒指跌穿二萬四，從技術指標去睇，恒指經歷過三頂都升唔穿上去，既是無力，又是無消息，就必然迎來基金大戶們的一波收割潮。

　　關稅戰、中東戰爭，對於股市而言確實係有辣有唔辣，個世界有消息先有炒作，無消息就無動力。所謂消息，其實好似拍一個波，有落就有上，越大力落就越大力上；最怕個波彈唔起，一直向前碌。

　　關稅戰就接近尾聲啦，中東戰爭又告一段落啦，嚟緊有咩炒作？一係就減息，一係新股浪潮，不過減息個幅度市場似乎唔買帳，新股呢一期都跌多過升，完全無咩睇頭。

　　市場無咩消息，而恒指經歷三頂又未能突破頸線，相信好快經歷收割潮，呢一頭半個月內會見真章，主要係我估計上市公司陸陸續續公布業績，走勢相當分化，但差嘅一定多過好嘅，所以市場都唔敢搏，炒埋呢轉最後的盛宴就散水了。

　　有現金嘅朋友建議可以等等，呢一轉可能出現大幅度回調，千幾點又唔一定，三千點又唔一定，反正養咁耐嘅韭菜點都要割一割；至於有貨的朋友們，我就唔建議繼續持有啦，睇圖都覺得有危機、個經濟又唔係特別好，食咗佢回返小小錢先啦。

　　今日跌穿二萬四，其實已經係一個重要警號，如果連續幾日都企唔穩呢個位，睇怕都係走貨信號了。　　

《編者按》本欄搜羅即市傳聞，惟消息未經證實，《經濟通》亦不保證內容之準確性。