《魚缸博客》大而美法案通過，清潔能源相關勢必調整

　　搞左咁耐，「大而美法案」終於通過，基本上都係針對前朝民主黨稅制去打，同時評價都十分兩極，大部分評論都係話會推高美國財赤，同時好似益左有錢人咁。

　　博客只係留意到，特朗普呢次好針對新能源咁，所以馬斯克先會有咁大反應；另一方面，博客都好明白點解特朗普要取消電動車及再生能源補助。

　　電動車呢家嘢，可以講得上係中國「全面制霸」，就算特斯拉幾強幾犀利，都鬥唔過中國低價出口；關鍵係，中國汽車電池某程度都壟斷市場同技術，無論歐美點追，成本低就係成本低。

　　呢個亦都解釋，點解豐田賣混能車依然有錢賺，但中國雖然係電動車領先，但盈利方面中國七間車企盈利夾埋，都鬥唔過一間豐田。

　　行返化石燃料汽車呢條路有無錯？博客覺得特朗普係想用返燃料車打低中國電動車，其實長遠都要睇市場取向。不過有一點肯定係，美國行翻化石燃料呢條路，就必須要推高能源／產出比，好似美國車咁大馬力、大CC，根本唔符合消費者心目中需求。

　　而家光伏、電動車呢類清潔能源都係中國做晒個市場咁，特朗普而家係咪開倒車？時間會告訴大家，佢輸唔輸已經唔重要，佢都仲有幾年會做總統，贏輸對佢來講都無所謂；有陰謀論講，佢開呢條法案都係想益佢班「商家朋友」，信唔信真隨便你。
　
《編者按》本欄搜羅即市傳聞，惟消息未經證實，《經濟通》亦不保證內容之準確性。