《魚缸博客》周杰倫進駐抖音，究竟咩葫蘆賣咩藥？

　　「周杰倫進駐抖音」呢件事已經成為內地同香港嘅熱門搜尋字，事關周董幾乎冇喺大陸開設社交帳戶，大家就梗係期待周董會唔會將啲新搞作甚至新歌放入抖音；而香港呢邊就係因為周董旗下隻巨星傳奇(06683)升到BANG BANG聲，唔講以為間公司俾抖音收購咗。

　　據聞呢次周董入左抖音，對家俾左一個「以億元計」嘅合作金，雖然官方梗係一致否認，但空穴來風，係真係假相信下一期巨星傳奇業績將會反映。

　　有趣嘅係，博客都有認真走入去周董個抖音望望，認真睇，其實並唔係「真周董」（當然都唔係咩粥杰倫、周果倫），而係周董嘅二次元創作人物，頻道取名為「周同學」。

　　呢下就有趣啦，即係話，周董「IP化」走入抖音，未必有太多娛樂性供應俾大家，更甚嘅係「賣『周』邊」：周杰倫嘅周邊產品。眾所周知抖音另一個搵錢途逕，就係直播同直播帶貨，以及抖音本身嘅商城。

　　所以一切謎團已經解開，其實周董入抖音，都係為搵錢，不過而家先來入，博客就覺得好似遲咗少少，但遲到好過無到，將自己形象「IP化」，當商品售賣，就好似星爺咁，其實都係未來趨勢，難保有一日，POP MART整返個LABUBU CROSSOVER 周同學公仔，賣你2999人仔，一樣大把人搶，呢個就係IP商業化嘅可怕之處。

　　至於公司股價係咪值得咁炒，就見仁見智了。博客始終覺得，作為周董粉絲，佢已經搵左幾世人都未必搵到嘅錢，但音樂作品好似來來回回無太多驚喜，可能都係消耗埋自己嘅剩餘價值罷了。

《編者按》本欄搜羅即市傳聞，惟消息未經證實，《經濟通》亦不保證內容之準確性。