《魚缸博客》經濟差市民需求娛樂愈多，盲盒抽Ｌａｂｕｂｕ成潮流

　　《魚缸博客》呢排香港女性個個都陷入一個難題：究竟抽Ｌａｂｕｂｕ好定係
ＣＲＹＢＡＢＹ好？有報道話最新系列Ｌａｂｕｂｕ　３﹒０今晚先開售，原價１００蚊唔到，
網上炒價已經去到１５００蚊！呢件事同近期要輸入正確驗證答案先可以入鋪抽
Ｃｈｉｉｋａｗａ一樣，堪稱「公仔界的瑜亮」。
　
　　有種講法，當經濟愈差個陣，市民需求娛樂嘅程度就會愈高，因為娛樂可以為市民帶來「麻
痺」作用，等大家忘掉煩惱。有人會打機睇電視電影，有人會選擇抽公仔，好似泡泡瑪特
（０９９９２）咁，旗下商鋪「ＰＯＰ　ＭＡＲＴ」開到成個東南亞都係，就係食正呢條「娛樂
至死」嘅水。
　
　　點解ＰＯＰ　ＭＡＲＴ會令人咁著迷？博客認為，公司玩「盲盒」呢招確實玩得幾好，呢啲
一百幾十蚊就可以買到嘅快樂，會令消費者唔覺唔覺就買多左幾盒；對比起擺晒一套十款公仔係
櫥窗到賣，抽盲盒會加入一種「賭博元素」係入面，只要抽中自己最愛個款，個腦就自然分泌多
巴胺，同你賭錢、夾公仔都係同一個道理。
　
　　所以泡泡瑪特點解股價有升無跌就係咁解，花旗研究報告話，泡泡瑪特首季收入按年增長
１６５％至１７０％，表現強勁，遠勝增長逾一倍嘅指引，主要由於去年同期低基數，以及哪吒
、Ｃｒｙｂａｂｙ等系列新產品銷售表現向好，推動中國市場按年增約一倍及海外市場增長約
４﹒８倍
　
　　博客覺得，日本或者美國ＩＰ開始出現困局，個困局就係佢地只係會用本地設計師，再做文
化輸出；中國泡泡瑪特其實無呢個問題，好似Ｌａｂｕｂｕ就係香港人設計，ＣＲＹＢＡＢＹ就
係泰國人設計，所設計嘅ＩＰ睇唔出地域痕跡，純粹係一款「大家都愛」嘅ＩＰ；經過
ＢＬＡＣＫ　ＰＩＮＫ嘅Ｌｉｓａ加持下，呢個品牌係東南亞更鞏固。
　
　　而家關鍵就係，究竟ＰＯＰ　ＭＡＲＴ做唔做到一個ＩＰ係可以攻打到歐美？如果真係做到
，股價或者可以翻倍，而且博客幾有信心，畢竟歐美而家經濟咁樣，比起東南亞更需求呢種「娛
樂」。
　
《編者按》本欄搜羅即市傳聞，惟消息未經證實，《經濟通》亦不保證內容之準確性。