《小傳日記》殺人鯨跳出水面！阿里影業奇蹟翻身有「錢」途？

　　《小傳日記》業績期差唔多尾聲，人哋出季績，巴巴（０９９８８）就出重磅年績，而呢次
年績跑出嘅唔係旗下ＡＩ業務，反而係隻阿里影業（０１０６０），業績公布以來四日累計升咗
六成有多，同系巴巴同阿里健康（００２４１）都要跌，唔通拍電影終於會發達？
　
　　眾所周知大中華要搞電影真係賺唔到大錢，打個和都已經合格有餘，但阿里影業全年計賺多
２８％，收入多３３％，而省鏡成績背後並唔係單靠拍電影。業績之後阿里影業宣布改名做「大
麥娛樂」，係股價急升嘅關鍵。不過當然唔係「改名轉運」就有得升，其實除咗阿里影業改名，
再上一層嘅巴巴六大業務之一嘅阿里大文娛，都改咗名做「虎鯨文娛」，正式加入「阿里動物園
」，當堂有「山雞變鳳凰」嘅感覺。
　
　　以往因為「拍電影唔賺錢」嘅觀念，加上業績都一如「唔賺錢」預期，阿里大文娛一直都喺
六大業務入面睇低一線。但據官方公開信提到，虎鯨文娛將會「以優酷和大麥娛樂為核心業務引
擎」，「堅定『內容＋科技』雙輪驅動戰略，為用戶提供線上線下全場景娛樂體驗」。可以睇到
，「大麥娛樂」係今次全新出發嘅一個重要契機。
　
　　阿里影業個名響噹噹，都要改名做大麥娛樂，全因為今年業績正正係靠大麥食胡。２０１７
年阿里系收購大麥網，到２０２３年９月阿里影業先正式以配股方式向阿里購入大麥。據阿里影
業最新全年業績分部收入一欄嚟睇，雖然電影製作收入仍然係最高，但毛利就按年大跌九成。相
反大麥全年收入暴增２﹒３６倍，毛利方面更加多賺３﹒３８倍，比起拍戲方面真係賺錢好多，
更加因為大麥先可以抵銷到拍戲嘅虧損，一個救全家，先令巴巴意識到係時候要搞大佢。
　
　　　數字人民幣計　　　　２０２５年　　２０２４年　　２０２５年　　２０２４年
　　　　　　　　　　　　　　收入　　　　　收入　　　　　毛利　　　　　毛利　　
　　－－－－－－－－－－－－－－－－－－－－－－－－－－－－－－－－－－－－－－
　　電影科技與投資製作　２７﹒１２億　２９﹒９９億　　７３２１萬　　８﹒１２億
　　大麥　　　　　　　　２０﹒５７億　　６﹒１３億　１２﹒３０億　　２﹒８１億
　　ＩＰ衍生業務　　　　１４﹒３３億　　８﹒２８億　　３﹒８０億　　２﹒１８億
　　劇集製作　　　　　　　５﹒００億　　５﹒９６億　　２５４０萬　　１４４６萬
　　總數　　　　　　　　６７﹒０２億　５０﹒３６億　１７﹒０９億　１３﹒２５億
　　－－－－－－－－－－－－－－－－－－－－－－－－－－－－－－－－－－－－－－
　
　　大麥嘅成功可以話係英雄做時勢，亦算係時勢做英雄，２０２３年巴巴將大麥業務撥落阿里
影業旗下，時間上啱啱好令到大麥新一年業績可以全面反映喺阿里影業入面，以成績表嚟睇的確
成為咗阿里影業嘅救命稻草，巴巴唔會只係咁啱有咁嘅操作，明顯係有意要救阿里影業。而經過
一年時間驗證，將大麥變成阿里影業主引擎就順理成章，改名更加係名正言順。
　
　　據中國演出產業協會資料，２０２４年全國演出市場總收入７９６﹒２９億人仔，按年增加
７﹒６％；大型演出平均跨城觀演率維持亦六成以上；而小劇場方面比２０２３年亦增加
１３﹒２１％，整體現場演出熱度並唔差過電影票房。而大麥網已經成長成為神州買飛嘅必經之
地，乘著現場演出行業嘅穩步增長，大麥倍數式嘅增長亦終於令巴巴把握呢個機會，正式將大文
娛業務升級，改名動作更加有戰略意義。
　
　　據虎鯨文娛公開信提到，揀虎鯨作為大文娛嘅象徵，因為「虎鯨身型龐大但靈活聰明」，可
以「通過協作維繫海洋生態平衡」，而且「對人非常加友好」，睇嚟發展方向都已經寫曬喺呢隻
殺人鯨身上，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。