《小傳日記》小米ＭｉＭｏ面世，ＡＩ大模型百花齊放定戰國時代？

　　《小傳日記》正當國家主席習近平南下視察上海，重點調研上海人工智能（ＡＩ）產業情況
，並要求上海力爭喺ＡＩ發展和治理方面走在前列，加快建成具有全球影響力嘅科技創新高地之
時。小米（０１８１０）正式推出開源大模型「Ｘｉａｏｍｉ　ＭｉＭｏ」，成為ＡＩ大模型發
展生力軍。據介紹小米大模型喺數學推理和程式碼競賽公開測評集上，ＭｉＭｏ僅用７Ｂ嘅參數
規模，超越ＯｐｅｎＡＩ嘅閉源推理模型ｏ１－ｍｉｎｉ和阿里Ｑｗｅｎ嘅開源推理模型ＱｗＱ
－３２Ｂ－Ｐｒｅｖｉｅｗ。至此，內地ＡＩ大模型再添一員猛將。（題外話，ＭｉＭｏ個名真
係改得麻麻哋，咪咪摸摸即係慢吞吞嘅意思，喺呢個大數據時代，點可以咪咪摸摸迎戰ＡＩ大模
型對手？）
　
　　自從年初ＤｅｅｐＳｅｅｋ以驚天地泣鬼神姿態面世，震驚世界科技及財經界，連世界政壇
都為之側目。自此，內地ＡＩ大模型發展更加一日千里，百花齊放。通義千問、文心一言幾次升
級，間間公司都雄心壯志，希望隨時彎道超車。企業間競爭激烈，ＡＩ大模型嘅排名榜亦瞬息萬
變。年初大出風頭嘅ＤｅｅｐＳｅｅｋ，喺１月份ＡＩ大模型平台「綜合實力排行榜」高居榜首
，亞軍係豆包大模型，通義千問緊隨其後，百度嘅文心大模型排第四，排第五嘅係訊飛星火。
　
　　但短短兩個月後，五強位置除咗文心大模型仍然穩守第四之外，其他排名全部大執位。喺３
月份ＡＩ大模型平台「綜合實力排行榜」，通義千問已經從後趕上，取代１月份大熱嘅
ＤｅｅｐＳｅｅｋ成為龍頭老大，原本１月份僅排第六嘅混元大模型亦以迅雷不及掩耳姿態，進
佔亞軍位置。而年頭獨領風騷嘅ＤｅｅｐＳｅｅｋ急退至第三，只有文心大模型仍然緊守第四位
。而１月份亞軍豆包意外跌出四強，僅排第五位。可想而知，內地ＡＩ大模型嘅競爭激烈之程度
。而呢個都只係綜合實力排行榜，如果再比較初創潛力榜、大模型應用等等其他排名，就更加七
國咁亂，當你仲未記得今個月排名時，下個月早已面目全非。
　　
　　除咗上述知名大模型之外，內地舊年總數有約八十幾家發展緊ＡＩ大模型嘅企業。有一定實
力同知名度嘅包括智譜ＡＩ、３６０智腦、崑崙萬維、商湯科技、騰訊元寶、階躍星辰、月之暗
面、Ｍｉｎｉｍａｘ、無問芯穹等。或者有人會擔心，大家一窩蜂搞ＡＩ大模型，會不會出現供
應過剩，甚至出現累似千禧年科網泡沫？
　
　　呢個問題真係好難答，事關科技年代，發展日新月異，大家都係摸住石頭過河，最終邊幾間
可以成功跑出，暫時無人知。當然，科企龍頭有財力、有技術，跑出嘅機會自然大啲。但又唔等
於其他對手無反勝機會。事關年初ＤｅｅｐＳｅｅｋ正正係以低成本、低質量晶片，成功挑戰
ＯＰＥＮ　ＡＩ投入巨大資金和技術砌出來嘅大模型。
　
　　至於類似千禧年科網泡沫爆破出現嘅機會更加細，事關當年爆破嘅主因係科網股被過分炒作
。當年只要同「ＤＯＴ　ＣＯＭ」扯上關係，股價隨時升天。而目前ＡＩ大模型除咗幾間科技龍
頭參與其中外，其餘ＡＩ大模型初創企業多數仲未上市。而幾間上市科企龍頭股價亦唔見升到失
理智。所以，ＡＩ大模型爆破機會幾乎不存在。而家有咁多間企業同時做緊ＡＩ大模型，可以話
係百花齊放，但同行之間競爭激烈程度又好似戰國時代。至於將來，邊個可以留低，邊個被淘汰
，就請拭目以待。請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。