《魚缸博客》泡泡瑪特長升長有？其實剎那的光輝不代表永恆

　　《魚缸博客》泡泡瑪特（０９９９２）出業績之後，博客都無咩做短評，因為真係無咩好評
；只要你係官方門店想買ＬＡＢＵＢＵ，一律都係話「無貨」，因為堆貨都係晒炒家身上，你想
用正價買到ＬＡＢＵＢＵ咩？ＳＯＲＲＹ，淘寶官方都要俾高小小價先有貨。
　
　　其實而家ＰＯＰ　ＭＡＲＴ門店都無乜嘢買到落手，博客見到都係ＣＲＯＳＳＯＶＥＲ產品
多，有天線得得Ｂ、ＭＯＬＬＹ之類，但就係無ＬＡＢＵＢＵ相關產品，不論深圳店定香港店都
一樣情況，ＰＯＰ　ＭＡＲＴ可以帶動商場人流，不過博客眼見就真係好似行嘅人多，買嘅人少
。
　
　　呢種「飢餓式行銷」，博客係早幾年ＳＯＮＹ出售ＰＳ５時候見過一次，大家引頸以待，餓
左大家好耐，餓下餓下，大家突然唔餓了。所以２０２４年同２０２５年ＰＳ５銷售，係出現左
下滑情況，到ＰＳ５一街都係貨個陣，大家已經轉去買ＸＢＯＸ或者出部ＰＣ了，ＰＳ５風光無
ＰＳ２咁瘋狂。
　
　　博客覺得ＬＡＢＵＢＵ都係呢個情況，顧客係可以餓，但如果「餓過饑」，同時市場又有替
代品，市場風向就會好快轉，到時你出幾多貨都無用，正所謂「剎那的光輝不代表永恆」可能就
係咁解。
　
　　其實呢種靠出售ＩＰ╱遊戲服務╱品牌嘅商品都係大同小異，你有爆款，最多搵幾年錢，但
你又無咩新款替代，顧客就會流失，然後慢慢股價就會回吐。早幾年騰訊（００７００）唔係王
者榮耀就食雞，而家講都無人講；２０幾年前人人都炒Ｅｓｐｒｉｔ，軟硬都幾乎係「代言人」
，而家呢？思捷環球（００３３０）都係得返３毫子股價。
　
　　潮流嘅嘢，真係話消失就消失啦。
　
《編者按》本欄搜羅即市傳聞，惟消息未經證實，《經濟通》亦不保證內容之準確性。