《小傳日記》無印良品推平價戰線攻神州下沉市場，點同拼多多鬥？

　　一直以「簡約、高品質、中高端定價」為核心競爭力嘅無印良品計劃於今年夏季喺內地開設日本市場外首個「無印良品500」平價細鋪。「無印良品500」主打商品價格喺500日圓以下（約23蚊人幣），以日化用品、文具、零食為主，賣場面積只係平時無印良品店鋪嘅六分之一大。

　　「無印良品500」嘅誕生，離不開日本經濟滯脹、家庭購買力逐漸吃緊嘅大背景。宜家無印良品喺內地推出平價品牌，當然都係迎合番神州消費降級同零售內捲嘅趨勢，不過今次涉及到品牌定位嘅調整，必然會產生一啲適應性問題。

　　無印良品一向行中產路線，主打簡約風、高格調，產品貴得有道理，而家突然踩入廿蚊戰場，班老顧客會唔會擔心無印良品向昔日競品名創優品(09896)睇齊，甚至要變得「拼多多」化呢？最驚搞到原有客源嫌cheap掉頭走人，新客又嫌唔夠平，兩頭唔到岸！

　　最多人質疑嘅一點係，日本同神州基層市民消費力有好大分別，零售市場生態都差天共地，而無印嘅商品可以做到幾平？神州零售業從來唔怕鬥平，例如名創優品早就將「平到盡」寫入DNA，成條供應鏈由設計到上架都為平價而生，零售價格普遍喺50蚊人幣以下；而喺淘寶、拼多多呢啲線上平台，電商玩家更可以做到產地直銷，冇中間商賺差價，加上有劣質商家靠模仿抄襲偷工減料衝銷量，令市場競爭更加惡劣。

　　即使「無印良品500」產品做到廿蚊人仔以內，對於部分月薪3000蚊嘅打工仔而言，CP值可能都唔算高，對比其他雜貨鋪都恐怕冇咩競爭力可言，而如果無印冇辦法平衡成本同品質，可能會陷入低價低質嘅惡性循環。

　　筆者覺得，「無印良品500」與其一味sell低價，倒不如打造「貴價貨平替」嘅形象更實際，再喺小紅書搵KOL幫手吹奏，其實只要做出一個「爆款」產品，就足以站穩陣腳。試想像，如果佢哋支平價化妝掃俾人拍條「無印良品隱藏版平價神器！性價比秒殺大牌」嘅短片，再tag埋「#貧民窟女孩救星」，一傳十十傳百，有機會一夜賣清倉！不過日本大企業向來作風守舊，而神州市場一向野蠻生長，如果想殺出血路就要多動腦筋，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。