《魚缸博客》你愛我，我愛你，齊抽蜜雪冰城甜蜜蜜！

　　《魚缸博客》千呼萬喚，蜜雪冰城（０２０９７）終於開招，招股價２０２﹒５元，係咪貴
呢？博客覺得，呢個世界只有買貴，無買錯，何況抽到你都暗盤走，你同佢講感情咩？呢期新股
算係當旺，好多大隻或者有名新股都有斬獲離場。
　
　　暫時博客撰文呢一刻，輝立就未有數據，但富途截至１１：４５ａｍ止，短短呢三個鐘已經
超購１７﹒７５倍，仲未計其他行，閒閒地超購過百倍，博客都覺得無咩難度。
　
　　蜜雪冰城有咩犀利？犀利在佢全國有４５０００間分店，同時單品售價咁低都可以搵到銀。
其實蜜雪冰城犀利在，佢做到規模效應，就可以做到供應商，變成全國供貨，所以蜜雪賺貨錢、
賺設備錢、賺加盟費。
　
　　全國茶飲商入面，應該無人賣得平過佢，而佢最出名一杯「檸檬水」，賣個位數價錢，一年
賣７０幾億杯，全國門店營收都幾百億。所以博客覺得招股價呢個位置，唔算平唔算貴。
　
　　關鍵就係，究竟蜜雪肯唔肯俾散戶賺下錢，係上限定價定下限定價。過往都出現過超標百倍
但又肯下限定價事件發生，所謂「大家開心」，如果係咁，博客立即飲多兩杯檸檬水慶祝下！
　
　　但首先，你要抽中……
　
《編者按》本欄搜羅即市傳聞，惟消息未經證實，《經濟通》亦不保證內容之準確性。