《小傳日記》信用卡被盜或轉賺四千倍！被動理財完勝抽蜜雪集團？

　　《小傳日記》你有冇諗過，有朝一日，信用卡畀人盜刷，你唔想報警，反而係笑到合唔到口
？仲要唔追究責任，反而想搵嗰兩個賊傾返個「分紅」條件？聽起上嚟好似電影情節？但呢單嘢
，真係喺法國發生咗！
　
　　故事嘅主角係一個法國人－－大衛，呢位仁兄喺現實世界上演咗一場荒誕喜劇。話說２月３
號，大衛嘅車俾兩個賊撬咗，書包畀人偷走，入面有佢嘅錢包同信用卡。一般人遇到呢啲情況，
第一時間梗係報警同埋打銀行熱線凍結信用卡啦！佢都唔例外。
　
　　當大衛打去銀行凍結信用卡嗰陣，佢發現自己張卡已經俾人喺附近一間煙草店用咗
５２﹒５０歐元。呢兩個賊就係用信用卡嘅非接觸式支付功能，買咗煙同彩票，都係啲細數目。
但戲劇性就係喺呢度出現！佢哋嘅彩票，居然中咗５０萬歐元（約４０６萬銀）頭獎！
　
　　大衛知道咗呢件事之後，第一時間通知咗彩票公司，話啲獎金係用佢張信用卡盜刷買嘅彩票
中嘅。宜家彩票公司凍結咗獎金。但係問題就出現喇－－如果兩個賊親自聯絡彩票公司攞錢，佢
哋好大機會即刻俾人拉，仲乜都攞唔到！但如果冇人去攞，呢筆錢就會變成無主獎金，最終都係
無人受益。
　
　　於是大衛諗到一條妙計－－佢向傳媒公開呼籲，希望嗰兩個賊搵佢嘅律師聯絡，大家「好商
好量」。佢表明自己唔會追究法律責任，仲願意同賊分錢，獎金一人一半！大衛希望利用呢筆獎
金換房貸。
　
　　大衛嘅信用卡被盜人碌咗５２﹒５歐元，但最終有望拎返２５萬歐元。咁計落，呢筆「投資
」如果成事，回報率高達４７６１倍，堪稱「年度最佳理財案例」。宜家大家仲喺度千計萬計諗
要唔要抽蜜雪集團（０２０９７），大衛嘅「被動投資」已經笑住等收成－－下次信用卡被盜刷
，記得講聲「多謝惠顧」啊。請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。