《小傳日記》老鋪黃金股價再創癲峰，邊個有潛力成為接班股？

　　《小傳日記》外圍股市近日好似遇到颱風咁，畀風吹到一仆一碌，噚日港股開市都受到震動
，但最後有驚無險，收市近乎平收。唔跌當升，已經好難得。今日恒指雖然繼續浮沉，不過，跌
市一樣有奇葩，老鋪黃金（０６１８１）今日再創「癲」峰，股價最高報７９８銀，逼近八百銀
大關，比噚日收市價６９３銀升咗１０５銀，即係話，如果噚日買入一手（１００股）今日最高
價賣出，都有成萬銀落袋。如果按升幅，最多升約１５％，咪話唔犀利！
　
　　呢兩年內地消費降級，唔單止樓價下跌，名牌包包店生意少咗，所以，無法想象點解老鋪賣
金可以咁好賺。不過，朋友同筆者講，老鋪賣嘅唔係黃金咁簡單，而係賣手藝咁話。筆者孤陋寡
聞，諗住無論嚿金點玩花臣，最終熔咗都只係得嚿金，值幾多錢都係同國際金價、純度、同重量
有關。唔知道原來消費降級嘅同時，竟然仲有人會願意使多咁多錢買古法手藝。記住！講緊嘅係
手藝，唔係古董！
　
　　既然古法手藝可以變藝術品咁賣，中華民族古代文明幾千年，古法手藝多的是。筆者忽發奇
想，如果用古法造「建盞」或者古法燒青花瓷，唔知會唔會好似老鋪咁好賺？查實老鋪仲未公布
舊年全年業績，有幾好賺其實未知。筆者見到股價咁癲，莫非當中有咩驚天動地嘅國家級核心技
術？唔係又點會上市未夠九個月，股價可以升接近１９倍？筆者又諗緊，既然咁好賺，點解唔等
多一年半載先上市，到時，單憑咁靚盤數，重新高幾倍、甚至幾十倍定價上市一樣有市場。而家
個價咁癲，唔知有幾多小散戶夠膽入市執返多少？又或者眼見手勿動？與其得個睇字，不如試下
搵下魚缸仲有無第二隻老鋪仲好。
　
　　按照筆者近期觀察，有兩隻半新股近期走勢都唔錯，首先係舊年１２月以２９﹒８銀上市嘅
美妝品毛戈平（０１３１８）。毛戈平今日最高１１８銀，上市３個月多啲股價最多升近３倍。
都話賺女人錢最容易，何況係關乎化粧美容嘅產品？毛戈平舊年半年業績同純利都按年齊升
４１％。雖然而家預測市盈率有成５２倍咁高。但老鋪之前５０幾倍時，筆者已經嫌太高，點知
股價長升長有，今日升到７８倍幾，都唔知幾時先升完，隨時升上近百倍都唔出奇。所以，啲股
價癲起上來，唔係我地呢啲魚缸常客睇得明既。
　
　　除咗毛戈平，內地茶飲龍頭蜜雪冰城嘅母企蜜雪集團（０２０９７）同樣具潛力，成為老鋪
接班股。蜜雪集團上周一（３日）先上市，上市價２０２﹒５銀，今日最高升至４４８銀。上市
第八日，累積最多升１﹒２倍，表現同樣出色。蜜雪預測市盈率接近３１倍，叫做正正常常。集
團舊年前九個月營按年收升２１％，純利更升４５％，成為股價繼續上升嘅動力。
　
　　毛戈平同蜜雪最終會唔會成為老鋪接班股，筆者真係唔敢講，事關上市一年未夠就升近１９
倍嘅股票的確魚缸罕有。不過，股價升勢有時未必同企業業績有太大關聯，有啲股票，就算年年
蝕錢都一樣炒得起，有時炒收購、有時炒國策、有時炒前景，總之股價要升任何藉口都隨時變成
真理。但最關鍵離唔開個錢字，只要背後有資金落鑊，醜股隨時翻身變靚股。小散戶如果夠膽博
，最緊要戴好頭盔。請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。