《魚缸博客》新東方兩大棍陽燭崛起！真係降本增效咁簡單？

　　《魚缸博客》魚缸２４０００後一路直上，都係多得鮑鮑突然鬆口話唔排除可以提早減息，
可能真係口硬得太耐，一有少少風向轉都令大家非常興奮。但要數奇蹟升勢，隻潛水好耐嘅新東
方（０９９０１）都突然異軍突起，連續兩日大棍陽燭咁上！
　
　　教育股唔係孖屐焦點咗好耐喇，但呢兩日忽然有大行唱好，其中高盛就話，因為新東方嘅學
習中心擴張開始減慢，預期帶來嘅盈利影響會收細，成本減少就準備會喺今個財年開始反映出嚟
，於是就唱好咁話。
　
　　其實新東方一直都係隻大慢牛，２０２１年教育雙減之後由百幾蚊跌到得返個位數，但由
２０２２年開始就一直慢慢升，其間除咗隻東方甄選（０１７９７）（前名新東方在線）轉型做
直播再做埋電商之外，教培行業都算勉強成功走出寒冬，主業同副業都迎來改善，令新東方個價
一直有前無後，由幾蚊升到上７６銀錢。之所以係大慢牛，全因為呢個升勢花咗前後接近兩年！
呢兩年個市都唔知上上落落過幾多次，但期間新東方平均每日三幾巴仙咁升，唔經唔覺升咗好多
，無乜人發覺佢已經係一隻慢牛！但有慢升就有慢跌，上年３月到而家一路回調，又已經一年多
啲時間，但今日呢一轉，莫非就係拗頭嘅訊號？
　
　　單係降本增效就升成咁？博客就唔係好信。內媒反而提到啲端倪；據天眼查顯示，新東方旗
下集思未來近期成立「新集思未來智慧科技」，註冊資本１０００萬人仔，經營電腦系統服務、
人工智能應用軟體開發、教育諮詢服務、電子元件製造等。應該就係其中「人工智慧應用軟體開
發」刺激到孖屐神經，新東方搞ＡＩ喇！仲唔係掃貨好時機？
　
　　真係要炒新東方ＡＩ嘅話，以走勢嚟睇呢兩日真係有升破位味道，話唔定就係波浪理論「３
浪」嘅開端！要知道「３浪」係最長最大嘅，如果真係「３浪」，現價要上返７６銀真係唔難，
不過當然都係一貫走勢陰陰升啦，反正一手唔貴，先跟小注霸定好位，等回落再溝啲，你都可以
騎到呢隻大慢牛！
　
《編者按》本欄搜羅即市傳聞，惟消息未經證實，《經濟通》亦不保證內容之準確性。