《魚缸博客》借唔借？新世界還唔還得到都似乎唔太想借！

　　《魚缸博客》剛剛先借完八百幾億嘅新世界（０００１７），呢頭又要撲水，拎自己堆物業
抵押，想借多百五億，不過市場似乎唔賣帳，德銀牽頭費煞唇舌，都係搵唔到水喉。把鬼咩，借
八百幾億俾你已經係上面意思，其實細行邊會想借，不過開到聲都要盡做；個百五億仲想籌旗？
叫周大福（０１９２９）啦！
　
　　以上說話其實博客嘅銀行朋友同博客分享，老實講新世界對上係仲有資產，不過人地唔想拎
出來救亡，保存實力都明白，所以而家就陷入咗呢種兩難局面：銀行唔太想借、但唔借銀行分分
鐘死多兩錢重。
　
　　你問博客，新世界搞到今時今日咁，係咪鄭志剛最大責任？博客唔完全認為，佢接手新世界
個陣創立「Ｋ１１」呢個品牌，其實係相當成功，某程度係令新世界行出第二條地產路，而且係
有錢賺的；但新世界搞到咁大筆債，當中呢個決定係咪鄭志剛一個人話晒事？更大程度博客覺得
佢係食咗個死貓，好似「波叔個仔」一樣，明明係老豆借落錢要個仔填數，但大家就瀨落阿仔身
上。
　
　　新世界目前唯一出路，只有等樓市轉角變好，先有機會將公司資產套現還債；而銀行肯借筆
大嘅原因，係確實睇到近期樓市有「輕微」回暖，加上政府開到聲，難聽講句，其實大家都係「
賭」一把；至於呢筆百五億細數，新世界還唔還得到，大家都似乎唔太想借！點解？而家呢個情
況，邊個唔想留多個錢係身？多筆ＣＡＳＨ好過多個風險啦。
　
《編者按》本欄搜羅即市傳聞，惟消息未經證實，《經濟通》亦不保證內容之準確性。